Луганск халкъ республикадан Россей сабийлени кесине алыргъа кюрешеди

Россейде сабийле аз туугъанлары бла байламлы аланы Луганск халкъ республикадан кесине кёчюрюрге кюрешеди. Мындан алгъа ёксюз къалгъан жетмиш алты сабийни Москва областьха жибергендиле, деп билдиредиле оппозициялы телеграмм каналла. Аны юсюнден войнасфейками.рф телеграмм-канал жазады. 

Ёксюз сабийлени кертиси бла да Луганск халкъ республикадан чыгъарадыла. Ол иш бек алагъа сабийле реабилитация ётсюнле деген мурат бла этиледи, демография проблемалагъа эс бурулмай.

 Ёксюзлени Москва областьны  акъылбалыкъ болмагъанлагъа деп социал жаны бла реабилитация этген аралагъа ийгендиле, ала бла эм иги специалистле ишлерикдиле. Ол санда психологла, аланы кёрген къыйынлыкъларын эсге алып, толу жашау этип башларгъа эм озгъан затлагъа къуруда эс буруп турмазгъа кереклисин ангылатырыкъдыла.  Аллай ишни ЛНР-ни Урунуу министерствосу  бла Россей Федерацияны регионларыны башчылары къурайдыла. Бир кесекден ол сабийлеге жангы юйюрлени табаргъа болушурукъдула. Шёндю окъуна аллай сабийлени россейли юйюрле кеслерине алып башлагъандыла. ЛНР-ни социал учрежденияларыны эсеплеринде 104 сабий барды, жууукъ заманлада аланы россейли юйюрлеге берирге хазырлайдыла.

 Луганск эм Донецк халкъ республикалада, Херсон эм Запарожье областьлада бардырылгъан референдумланы итогларына кёре, ала энди Россей Федерацияны субъектлерини санындадыла, ол шарт а ёксюз къалгъан сабийлеге къарау эм аланы юйюрлеге тапдырыу ишни тийишлисича бардырыргъа иги онг береди.