Тюркню къонакъ юйлери «Мир» карталаны алыргъа унамайдыла

Тюркню къонакъ юйлери ол къыралны Ара банкы кийирген жангы жорукълагъа кёре россейли «Мир» карталаны алыргъа унамайдыла, деп билдиредиле украинлы телеграм-каналла. Аны юсюнден войнасфейками.рф телеграм-канал жазады.

Россейни туроператорларыны ассоциациясы ол отюрюк хапар болгъанын айтханды. «Тюркде бюгюнлюкде «Мир» картала бла тыйгъычсыз хайырланыргъа боллукъду». Карталаны алмагъан жер бар эсе, ол жаланда, алгъын заманладача банкланы энчилигине кёреди. Сёз ючюн, къонакъ юйню финанс жумушларын жалчытыргъа жууаплы болгъан банк санкциялагъа тюшген эсе, ол «Мир» картала бла ишлемейди. Аллай кезиуле бек аздыла», деп чертгендиле Россейни туроператорларыны ассоциациясындан.

Бизни къыралдан баргъан жолоучула тыйгъычсыз «Мир» картала бла тюкенледе сатыу-алыу этерге боллукъдула эм тамамланнган  жумушла ючюн да тёлерге жарайды. Тюрк республика Россейге къажау санкциялагъа къошулмагъанды. Карталаны бир-бир кезиуледе ишлемей къалгъанлары, ол къайсы финанс биригиуню иелигинде болгъанынданды.

Россейли карталаны Тюркде ишлемегенлерини юсюнден ётюрюк хапар болгъанына шагъатлыкъгъа, шёндю анда солуй тургъан туристлени жазгъан билдириулерин окъугъан адам ангыларыкъды.

Бизни корр.