Жашау жоругъу – тёгерекде халны игилендирир ючюн, къолдан келгенни аямазгъа

Бу кюнледе юбилейин Элбрус районну халкъны социал жумушларын жалчытыу комплексли арасыны социал-турмуш бёлюмюню башчысы, республиканы Парламентини депутаты, Коммунист партияны жер-жерли бёлюмюню биринчи секретары Хасаитланы Лиза Локмановна белгилегенди. Ол социал жашаугъа тири къатышхан инсанды, нёгерлери уа бийик усталыгъын, билимлигин, огъурлулугъун, аны бла бирге уа тутхан ишине кертичилигин бла аны толтурууда къатылыгъын чертедиле. 

 Лиза Локмановна Къазах ССР-ни Алма-Ата шахарында 1952 жылны 27 августунда туугъанды. Кёчгюнчюлюкден сора туугъан жери Кёнделенге  къайтхандан сора элде мектепни бошагъанды, кёп да турмай, Тырныауузда алаша вольтлу аппаратура чыгъаргъан заводда урунуп тебирегенди. Производствону башха-башха жерлеринде ишлей, талай усталыкъгъа юйреннгенди. Ишни болушун кёргюзтген Теммоланы Жаннет Омаровнаны ол уллу жылыулукъ бла эсгереди. Аны болушлугъу бла Хасаитланы Лиза урунуу коллетивге тынч къошулгъанды, усталыгъыны жашырынлыкъларына тюшюннгенди. Кесини бёлюмюнде ишни толтуруугъа къаллай уллу жууаплылыкъ салыннганын ангылап, цехде нёгерлерин сокъурандырмазгъа кюрешгенди.

Бир кесек замандан Лиза Локмановнаны Орджоникидзеде тау-металлургия техникумгъа жибередиле, ол окъууу бла бирге ишин да бардырады. Техникумну бошагъынчы производствону мастерини къуллугъуна саладыла, алайда тиширыу 14 жылны урунады, ызы бла 11 жылны заводну кадрла бёлюмюне таматалыкъ этеди.

- Ол сейир, иги заман эди, - деп эсгереди Лиза Локмановна. – Биз бир юйюрча жашагъанбыз, къарыуубузну аямай ишлегенбиз, чыгъарылгъан продукциябызны – машина ишлеу промышленностьха башха-башха модификациялы релеле жарашдырыуну - качествосу бек бийик болуруна къарагъанбыз. Ала дунияны 20-дан аслам къыралына сатылгъандыла. Заводда «Берёзка», «Романтики» эм башха комсомол-жаш тёлю бригадала къуралгъандыла. Ала, бир бирлери бла эрише, бийик кёрюмдюлеге жетгендиле. Эм иги къауумланы заводну башчылары белгилегендиле, алчыланы суратлары Махтаулукъну къангасына салыннгандыла. Солуубуз да ахшы ётгенди, заводну клубунда кёп сейир мероприятие бардырылгъанды, ишчилерибиз спорт бла кюрешгендиле, шахарда эришиулеге къатышхандыла. Уллу Октябрь социалист революциягъа аталгъан байрам ишлеге барыбыз да бирге чыкъгъанбыз.

 Ала барысы да тарыхда къалгъанлары Лиза Локмановнаны айхайда, жарсытады. Къырал чачылгъаныны, экономика эм башха байламлыкъла юзюлгенлерины хатасындан, кёп башха производстволача, завод да ишин тыйгъанды. Бир кесек заманны ол ачылып тургъан эсе да, ол болжал кёпге созулмагъанды. Алай бла тынгылы производство-техника амаллары болгъан жер керек болмай къалгъанды. Аны спецалистлерине уа билимлерине, сынамларына кёре жангы ишчи жерле излерге тюшгенди.

Лиза Локмановна, усталыгъын тюрлендирип, Элбрус районну Халкъны социал жумушларын тамамлау комплексли арасына секретарь-делопроизводитель болуп киргенди. Андан социал иш жаны бла специалистни къуллугъуна кёчюргендиле, ызы бла уа араны социал-турмуш жумушла жаны бла бёлюмюню башчысына салгъандыла. Анда тигиу эм парикмахер ишле бла кюрешедиле, жангызда социал службада эсепде болгъанланы жумушларын толтургъандан тышында, хар келгеннге да къарайдыла. Бёлюмню тырныауузчуладан сора да, районну башха жерлеринден адамла да жаратханларын да белгилерчады. Алай бла Хасаитланы Лизаны битеулю урунуу стажы 50 жылдан атлагъанды. 

Политикада жолуну юсюнден айтханда, ол Коммунист партиягъа 1975 жылда къошулгъанды. Бюгюн да, кёп заман ётген чакъда, коммунизмни ниетлерине кертичилей къалгъанды. 2000 жылда партияны районда бёлюмюню секретарына айырылгъанды, КПРФ-ни республикалы комитетини къауумуна да киреди.

- Бусагъатда жашау, сёзсюз, тюрленнгенди, - дейди Лиза Локмановна. – Совет заманда къураугъа, айбатландырыугъа аслам эс бёлюннгенди, жамауат биригип бир муратны толтурургъа итиннгенди. Бусагъатда халкъны бирикдирген алай кёп зат жокъду, инсаннга алгъан билимине кёре иш тапхан тынч тюйюлдю, адет-намысха келишмеген халла да чыгъа турадыла. Жарсыугъа, юйюрледе да бирлик тюбемеген кезиуле асламдыла, тамблагъы кюннге ышаныу да азды. Жашау магъаналы сорууланы толтурургъа, кертиси бла да, сюйюп, итинип кюрешсенг, кёп затны иги жанына тюрлендириге болллугъуна ишексизме.

Лиза Локмановна районда къуралгъан жамауат магъаналы битеу ишлеге тири къатышады. Ол партия бёлюмге башчылыкъ этгени неда Парламентни депутаты болгъаны бла да байламлы тюйюлдю. Анга биринчи жерде жерлешлерини къадарлары, аланы тынчлыкъларыды. Организацияланы таматалары, жамауат биригиулени келечилери, жаш тёлю, сабийле бла байламлыкъла жюрютеди. Адамла бла ушакъларында кесини оюмун айта, тюз насийхат эте биледи. Сагъышлары, жюрек излемлери туугъан жеринде жашауну бютюн ариу, огъурлу этиуню юсюндендиле.

 Уруннган жылларыны ичинде Лиза Локмановна кёп саугъагъа тийишли болгъанды, аланы араларында «Урунууда айырмалылыгъы ючюн» майдал, «Социализм эришиуде хорлагъаны ючюн», ЦК ВЛКСМ «Бешжыллыкъны жаш гвардиячысы» белгиле, «Партийная доблесть» орден, Дунияны совет фондуну сыйлы белгиси бардыла. Ишсиз Хасаитланы Лиза бир кюнюн да ётдюрмейди, къолундан келгенича тёгерегинде болгъанны игилендирирге, тюрлендирирге кюрешеди, ол аны жашау жоругъуду.

 

Анатолий ТЕМИРОВ.
Поделиться: