«Жангыдан сайларгъа тюшсе эди, энтта да бу усталыкъны айырлыкъ эдим»

Къазийланы Фатимат, Холамханланы Хакимни  къызы, Къашхатауну район больницасыны   сабий бёлюмюнде уруннганлы  къыркъ тёрт жылдан атлагъанды. Ол бийик категориялы медсестрады. Ишин тынгылы билген, анга кертичилей къалгъан адамды. «Жангыдан сайларгъа тюшсе эди, энтта да бу усталыкъны айырлыкъ эдим. Анча заманны ичинде не бек къыйналгъан кезиуюмде да сокъуранмагъанма. Башха усталыкъгъа кесими келишдиралмазлыкъ сунама»,-дейди.

Ол Хасанияда туууп ёсгенди. Школну да анда бошагъанды. «Къоншубуз Чапайланы Люда медсестра болуп ишлей эди, алагъа барып, ол акъ халатны жуууп, итиу ургъанын кёрсем, жюрегим бир сейир этиучю эди. Аны алай сюе эдим киерге. Аны ючюн болур, Нальчикде медицина училищеге кирип, фельдшер бёлюмню бошайма»,-деп хапар айтады Фатимат мени бла ушакъда.

Ишлepгe уа аны Къашхатауну район больницасына жибередиле. Анда сабийлеге бакъгъан бёлюмде медсестра жокъду деп къызгъа ол ишни буюрадыла. «Алгъа ол оноугъа бюсюремеген эдим, алай артдан-артха бютюн бек жаратама ишими. Ол заманда сабий врач Къоркъмазланы Люда мени кёллендирген эди эмда кёп затха да юйретеди. Сау болсун. Аны адамлыгъына жетген жокъ эди. Артда больницагъа башчылыкъ этгенинде да, кесин кётюрмей, къайсыбызгъа да сёзю, иши бла да болушханды»,-деп уллу ыразылыкъ бла эсгереди.

 Ол бу багъыу учрежденияда тюрлю-тюрлю жыллада ишлеген Къоркъмазланы Омарны, Чаналаны Абдуллахны, Мокъаланы Жанхотну, Жылкъыбайланы Мариямны, Мокъаланы Нюржанны да атларын сюйюп сагъынады. «Къарындашлача, эгечлеча бир бирге билеклик эте ишлегенбиз эмда ишлейбиз. Алагъа тюбегеним манга уллу насып эди. Коллектив, больница, саусузла - ма oлдy мени жашаууму уллу кесеги, мен аны бир затха да алышаллыкъ тюйюлме»,- дейди.

Юйюр бла да аны насыбы тутханды. Къазийланы Анатолий бла   эки къыз бла жаш ёсдюргендиле. Бийик билимли этгендиле. Бирери бирер жерде урунадыла, юй-кюн болуп жашайдыла. Жууукъ юлюшлеринден да къууанады Фатимат. Келини, эки киеую да кёлюн аладыла. Сегиз туудугъу да барды. Толу юйюрю, сюйген иши…  Аллай насыпды адамны къарт этмеген. Ма Фатиматха да алтмыш жыл толгъанды деп ийнаныргъа къыйынды.

Къагъанакълагъа, бютюнда саусузлагъа, къарагъан тынч тюйюлдю. Ала не затлары ачыгъанларын айта билмейдиле да. Уллуракълагъа уа укол этип, дарман да берип бир кёрчю! Алай Фатимат хар бирине жол таба биледи, тюз да кеси баласынача къайгъырады, жууундургъан да этер, бурунчукъларын да тазалар. «Сабийле сейирдиле, не сюйгенлерин билген къыйынды. Бир жол Огъары Малкъардан бир жашчыкъны келтиредиле. Ол асыры жилягъандан, киши тохтаталмай эди. Мен а, телефонуму чыгъарыn: «Къарачы, жилягъанынгы къоюп, укол да этдирсенг, муну санга ойнаргъа берликме»,-дейме. Ол а, шошайып, уллу кишича:  «Кесим аладан къачып айланама, не затха бересе муну манга»,-дейди»,-деп кюледи Фатимат.

Ол ишини юсю бла районда школлагъа, сабий садлагъа да терк-терк барады. Жаш специалистлеге да насийхатлыкъ этеди: «Иги врач болур ючюн, бек алгъа медицина училищени бошап, тёрт-беш жылны больницада  ишлеп  кёрюрге керекди», -дейди.

Юйюне келсе да, ол ишинден айырылып къалмайды. Аны болушлугъун излеп къоншуда-тийреде кёпле келедиле. Ол а бирлеге къайсы врачха барсала, иги боллугъун юйретеди, башхалагъа доктор буюргъан багъыу амалланы этеди.

 -Бизде юч бала барды, аланы бурун суулары келип башласа окъуна, олсагъат Фатиматха жетеме. Орамда ауругъан сабийге, уллугъа да ол кёз-къулакъ болмагъан жокъду. Огъурлу адамды, башхалагъа жан аурутхан. Бек башы уа - къолу женгилди. Ол укол этген сабийле окъуна  аны орамда кёрселе, аллына чабып, къучакъламай къоймайды­ла. Гитчени алдагъан къыйынды, ол халал жюрекли болмаса эди, анга ала алай жалгъышырыкъ тюйюл эдиле,-дейди Чочуланы келинлери.

-Фатимат Хакимовнаны сынауу уллуду, болсада  медицинада жангылыкълагъа эс бургъанлай турады. Медикле ачыгъаннга, ауушханнга юйренчек болуп къаладыла деп, кёпле алай сунадыла. Ол а алай тюйюлдю. Биринчи ишлеп башлагъан кюнлеринде бир къагъанакъчыкъ туугъанлай ёледи. Фатимат бла Къоркъмазланы Людмила, кеслерин тыялмай, жиляйдыла. Аны эшитип, баш врачны орунбасары Мокъаланы Жанхот а: «Сиз телими болгъансыз, больницада туугъан, ауушхан да болады, аланы хар бирини ызындан алай жиляп турсагъыз, сизден къаллыгъы жокъду. Бусагъатдан кесигизни къолгъа алыгъыз, медицинада кёлсюзлюк этерге жарамайды, деп урушхан эди. Болсада биреуню жарсыуун кёрюп, кесинги тыйгъан бек къыйынды»,­дейди бёлюмню баш врачы Зокаланы Альбина.

 -Медицинада ишлеген ким болса да- врачдан башлап санитаргъа дери-башханы къыйналгъанына уллу кёллю болмазгъа керекди деп, мени оюмум алайды. Бизни усталыкъда ич дуниянгы, халинги кёргюзтюрге жарамайды, врач айтхан затланы тынгылы толтурургъа борчлуса:  саусузну аягъы юсюне  болуруна бизни халибиз бир тюрлю чурум этмезге керекди. Медсестраланы быллай сёзлери барды: «Ишибиз ууакъ-тюек  затладан къуралады, болсада анда сансыз этерча зат а чыртда жокъду»,-дейди Фатимат Хакимовна.

Медсестраны юсюнден аны биргесине тaлай жыл ишлеген Бёзюланы Фатимат, Къойчуланы Соня да кёп ариу сёз айтхандыла. «Аны огъурлу къоллары, эслилиги эмда жюрек халаллыгъы аурууну хорларгъа болушадыла. Ол кёплеге жарагъанды, этген ахшы  ишлерини  юсюнден  айтыргъа артыкъ сюймейди, иймекчек  адамды»,- дейдиле.

Аны къыйынын оноучула да кёргендиле, тийишли багъа бередиле. Аны тюрлю-тюрлю жыллада алгъан сыйлы  грамоталары, белгилери да  кёпдюле.  Алай бек уллу махтау а  ол бакъгъан балачыкъларыны бетчиклерини жарыгъанларын, аланы ата-аналарыны ыразылыкъларын санайды.