Окъуучула, устазла да ашыгъып сакълайдыла

Кёп болмай Бахсан  районну администрациясыны башчысы   Артур Балкизов, муниципалитетде  билим учрежденияланы жангы окъуу жылгъа хазырлыкъларын билир хыйсап бла ишчи жолоучулукъгъа чыкъгъанды. Аны чеклеринде профильли  управленияны келечилери бла бирге  Жанхотияны орта   школунда да  болгъанды.

Къонакъла биринчи  школну арбазына къарагъандыла  эм ичинде болум бла да шагъырейленнгендиле. Мында  «Билим бериу» миллет проектге кёре  мектепни эки классына ремонт этип бошай турадыла. Алгъаракълада уа  спорт залны, ашхананы эм  кабинетлени да жангыртхандыла.  Ол санда тюрлю-тюрлю усталыкъладан къошакъ билим берирча «Точка роста» араны ачаргъа да онг табылгъанды.

Жанхотияны школу 1974 жылда ишленнгенди эм юч жюз сабийге жараулуду.  Бюгюнлюкде анга тынгылы ремонт этиуню  проект-смета документациясы  хазыр этилгенди. Аны себепли мектепни жангыртыллыгъын эм  мардалагъа келиширча боллугъун  коллектив эм окъуучула да ашыгъып сакълайдыла.

Эсге сала айтсакъ, быйыл Бахсан районну жер-жерли бюджетинден   школланы ремонтларына 5 миллион сомдан аслам бёлюннгенди, ол санда   «Точка роста» араланы ачаргъа да.