Алан патчахны къаласы табылгъанды

Кёп болмай Нарсана шахар  округда  Луначарский бла  Аликоновка эллени арасында  къаяланы биринде  орта ёмюрледен къалгъан къала табылгъанды. Алгъадан этилген оюмгъа кёре,  ол алтынчы ёмюрде жашагъан Саросий деген  алан патчахныкъы болгъанды.   
 - Аны алгъаракълада бу тийрелени къыдырып айланнган жерлешлерибиз тапхандыла.  Эрттегили деменгили къаланы  жаланда  мурдоруну бир кесеги  къалгъанды. Болсада аны  чабакъгъа ушагъаны бурун заманланы неда орта ёмюрлени  архитектурасына келишгенин ачыкълайды.  Россейни эм тыш къыралланы белгили археологлары айтханларыча, Аликоновка сууну къатында, къая башында, Кюнбатыш Кавказгъа ётген ауушну аллында Саросийни къаласы сюелгенди. Белгили аскер башчыны юсюнден Византияны тарых шартларында кёп айтылады.   Мындан арысында ол   туристле келирге сюйген жер болур деп бек ышанабыз, – дейди Нарсана шахарны администрациясыны башчысы Евгений Моисеев.
Жаудан сакъланырча ишленнген къалада юйюрлери бла  300 аскерчи  жашагъанды. Жау чапхан заманда уа анда   дагъыда 700-ден  аслам адам бугъуннганды.   Бу тийреледе жашагъанла тау этекледе мирзеу салгъандыла, бахча ишлегендиле.  Аланы къол  къыйынларыны кючю  бусагъатда да тау бетледе  ачыкъ эсленеди.   
Иги да алгъада он жылны ичинде   къаланы тийресин Москвадан экспедиция  къазып, тинтип кюрешгенди. Ишле   этнология эм антропология  институтну  этноархеология бёлюмюню таматасы Ирина Аржанцеваны башчылыгъы бла баргъандыла. Аны башламчылыгъы бла  орта ёмюрню къаласын тинтирге Англиядан, Израильден, Германиядан эм АБШ-дан специалистле келе тургъандыла.   Болсада алан шахарда  археология ишле 2005 жылда тохтатылып, объект  унутулур чекге жетген эди.  

Бизни корр.
Поделиться: