Элбрус райондан

Элбрус райондан

Тазалау объектле кючлендирилликдиле

Минги тауда туристлени саны кёбейгени бла тазалау объектлени кючлендириуню проблемасы аслам эс излейди. РФ-ни «СКФО-ну айнытыу» къырал программасыны чегинде Азау тала бла Элбрус элни араларында жангы магистраль коллектор ишленеди, аны узунлугъу 17 километрден асламды, сора болгъан тазалау объектле да жангыртыладыла. Къурулуш экинчи жылны ахырына бошалырыкъды.

Минги таугъа ишчи жолоучулугъуну кезиуюнде Россейни экономика айнытыу министри Максим Решетников туристлеге, элчилеге  да таплыкъгъа мадарла этилгенлерин белгилегенди. Ол айтханыча, керекли инфраструктура болмай, тау-лыжа курортну андан ары айнытыр амал жокъду.  

Спортзал жангыртылады

Мектепледе спортзалланы тийишлисича халда тутуугъа хар заманда да уллу магъана берилгенди. Алай Тырныауузну В.Г. Кузнецов атлы 6-чы номерли школунда анга ремонт этилмегенли иги кесек заман болады. Быйыл «Хар сабийни жетишими» федерал проектге кёре анда жангыртыу ишле толтуруладыла: терезелери бла полу алышынадыла, къабыргъалары бла башы боялады, окъуучула кийиннген отоулагъа да къаралады. Алай бла жангы окъуу жылда сабийле жарауларын ариу спортзалда бардырлыкъдыла.

Краеведение музейге – субсидия

«КъМР-ни маданияты» миллет проектни чегинде Элбрус районну Отарланы Омарны атын жюрютген краеведение музейине 2 миллион 700 минг субсидия берилгенди. Ол ахчагъа жангы мультимедия оборудование, кёрмючле бардырыргъа билдириу киоскла, шкафла, экспонатланы сакъларча темир стеллажла, алагъа тёп-тёгереклеринден къарарча мияла витринала, столла, подиумла эм башха кереле алыннгандыла. Техниканы жартысы музейни Кёнделенде бёлюмюне жиберилгенди.

Минги таугъа ёрлеу

 Къабарты-Малкъарны къыраллыгъыны 100-жыллыгъын белгилеу бла байламлы «Эльбрусиада – 2022» бардырылады, анга Россейни регионларындан аслам адам къатышадыла. Ала, эки къауумгъа юлешинип, тауну эки башына классикалы маршрутла бла барлыкъдыла.  

Ёрлеучюле 18 жылдан гитче болмазгъа, къаялагъа миниуде хазырлылыкъны ётерге, жарау этерге эркин этген медицина справканы алыргъа эм альпинизм бла кюрешгенде къыйын болумладан страхование этдирирге борчлудула. Къауумланы биргелерине сынамлы инструкторла барлыкъдыла.