Уллу байрамгъа жораланып

25 -27 августа Нальчикде  «KAVKAZ MUSIC FEST» музыка фестиваль ётерикди. Анга Шимал Кавказны бла Россейни   Юг регионларындан эм Белоруссиядан да беш жюзге  жууукъ  артист къатышырыкъды.

-  Фестиваль Къабарты-Малкъарны 100 –жыллыгъына жораланныкъды. Аны баш  магъанасы  Шимал Кавказны бла башха регионланы артистлерин бирикдириргеди.  -Байрамны къураргъа оюм  миллетлени бла маданиятланы  байламлыкъларын кючлеген Беларусь Республикада  „Славянский базар в Витебске“ туудургъанды,- дейди аны  продюсери  Тимур Хацаев.

Ол айтханнга кёре, программаны  иги кесеги Жашил театрда бла Ара солуу паркда бардырыллыкъды.  Аны ачылыуу Жашил театрда «Звезды 100-летия»  концерт бла башланырыкъды. Анга Авраам Руссо, датчанлы Томас Невергеен, Черим Нахушев, Астемир Апанасов, Сати Казанова, Текуланы Амур, Денис Клявер, Аскер Бербеков дегенча белгили  артистле, «Кабардинка», «Балкария» ансамбльле къатышырыкъдыла.

Экинчи кюнде «Ритмы Кавказа» концертде: «Кабардинка», «Балкария», «Нальмэс», «Исламей», «Эльбрус» ансамбльле тепсеу номерлерин  кёргюзтюрюкдюле.   Фестивальны программасыны чеклеринде регионда креатив индустрияны айнытыугъа жоралап  жаш тёлю  конференция боллукъду. Андан сора да, шахарда «Народные промыслы» ярмарка-кёрмюч ишлерикди. Мында башында сагъынылгъан регионладан къол устала кеслерини сейир чыгъармалары  бла шагъырейлендирликдиле.

 Байрамны жабылыуунда  да  Шимал Кавказны бла  бла Россейни артистлери къатышып  «Afterparty SHOW! «жаш тёлю концерт ётерикди.

 Нальчикни администрациясыны башчысы  Таймураз Ахохов быллай  фестивальны тёрели этерге мурат болгъанын да букъдурмагъанды.

Магометланы Сулейман.
Поделиться: