Таматала борчларын билирге керекдиле

Бюгюннгю законлагъа  тийишлиликде, окъуу учрежденияланы от тюшюуден къоркъуусузлукъларын жалчытыу толусунлай аланы таматаларыны боюнундады.

Жангы окъуу жылны аллында сабий садланы бла школланы тийрелери тюрлю-тюрлю кир-кипчикден таза болургъа керекдиле. Андан тыщында да акъгъан чапыракъланы кюйдюрюрге аз да эркин этилмейди. Нек дегенде жел аланы юйлени башларына кётюрюрге боллукъду. Аны бла бирге уа от да тюшерге. Къыш кезиуню юсюнден айтханда да, ол заманда тёгерекни къардан таза тутуу бек магъаналыды.

Билим берген учрежденияла адамла аслам жыйылгъан объектлени къауумларына киргенлери себепли, алада къыйын болумну кезиуюнде халкъ тап чыгъарча онгла къуралыргъа керекдиле. Эвакуациягъа чырмау боллукъ затланы кетерирге борчлудула таматала. Жорукъла бла тийишлиликде, хар школда да эвакуацияны кезиуюнде адамла тышына чыгъарча эки эшик болургъа керекди. Бири болгъан жерде от  болса, халкъны экинчи жаны бла чыгъарырча. Аланы чюйле бла уруп бегитирге аз да эркин этилмейди. Дагъыда ала жаланда ичинден жабылыргъа керекдиле.

Атлауучланы халлары да бу ишде энчи магъананы тутадыла. Тапкаланы тюплеринде складла къураргъа эркин этилмейди. Дагъыда аланы агъач эм башха терк жаныучу материалла бла тышларгъа ахырысы бла да жарамайды. Нек дегенде от тюшген кезиуде ала халны жаланда осал этедиле.

Окъуу юйлени эвакуациялы жолларында болгъан жерледе турникетле, босагъала эм тёгерек бурулгъан эшикле орнатыргъа эркин этилмейди. Нек дегенде ала барысы да адамланы объектден терк чыгъыуларына чырмаулукъ этерикдиле. Дагъыда терезеледе темир чалдишле  орнатыргъа да жарамайды. Аллай кезиуде аланы да хайырланыргъа эркин этиледи. Хар устаз, окъуучу эм студент да аллай къыйын болумлагъа хазыр болургъа керекдиле. Сабийле от тюшгенни кёргенлей, мычымай, устазларына билдирирге неда тийишли службагъа сёлеширге борчлудула.

Сабий садлада бла школлада ишлегенлени баш борчлары аллай кезиуледе гитчелени къоркъуусузлукъларын жалчытыуду. Бек-биринчиден ала «101» службагъа сёлешип, халны ангылатыргъа керекдиле. Ызы бла сабийлени эвакуацияларын башларгъа. Энчи эс от тюшген отоуну жанындагъылагъа бёлюрге. Окъуучуланы къоркъуусуз жерге чыгъаргъандан сора аланы санап санларын тохташдырыгъа борчлудула. Сора ызы бла, кеси кючлери бла, отну ёчюлтюрге кюреширге керекдиле.  

 Тышына чыгъып, от ёчюлтюучюлеге жолну кёргюзтюу магъаналыды. Нек дегенде ала объектге къалайны эм къалай къаршы кирирге кереклисин билмезге боллукъдула.

От тюшгенни кёргенлей стационар телефонладан «01» номерге сёлешигиз. Мобильный телефонладан а «101» деп алдырыргъа боллукъду.

Сакъ болугъуз! Кесигизни сакълагъыз!

Къасымланы Аминат.
Поделиться: