Аскерчилеге эм аланы юйюрлерине къаллай тёлеуле тийишлидиле?

Аскерчиле эм право низамны сакълаучу органланы келечилери пенсиягъа чыкъгъанларындан сора пенсияларын кюч ведомстводан алгъанындан тышында, бир-бир болумлада граждан жаны бла тёлеулеге да тийишлидиле. Аны ючюн адам аскер службасын бошагъандан сора граждан ишде урунургъа, алай бла пенсия балла жыяргъа керекди. Быйыл излемле былайдыла: урунуу стаж азындан 13 жыл, пенсия коэффициент а – 23,4 болургъа тийишлидиле. Пенсия жыл сан: эр кишилеге - 61,5, тиширыулагъа – 56,5 жылды. Бюгюнлюкде Къабарты-Малкъарда страховой пенсияны 1283 алгъыннгы аскерчи аладыла, деп билдиредиле Россейни Пенсия фондуну регионда бёлюмюнден.

Пенсиядан тышында отставкада аскерчиле энчи социал тёлеулени алыргъа эркиндиле, ол санда ай сайын берилиучю ахча тёлеулени да (ЕДВ). Ол федерал льготалагъа кёре борчларын толтура сакъат болгъан аскерчилеге (МЧС-ни, Ич ишле органланы келечилери бла от ёчюлтюучюле), къазауатланы ветеранларына, ёлген аскерчилени юйюрлерине, Россейни бла СССР-ни Жигитлерине, Уллу Ата журт урушну ветеранларына эм аланы юйюрлерине тохташдырылады. ЕДВ-ны бусагъатда миллиондан аслам адам аладыла.

2022 жылдан башлап аскерчилени юйюрлерине эм кюч ведомстволаны келечилерине социал къорууланыу органла бериучю талай пособияла Пенсия фондха ётдюрюлгендиле. Аланы араларында аскерге чакъырылып къуллукъ эте тургъанны юй бийчесине ай сайын тёлеуле, аны сабийден ауурлугъу бар эсе, призывникни сабийлерине ай сайын берилген пособияла эм аланы жайда лагерьге барып солурларына ахча, ёлген аскерчилени юйюрлерине коммунал службалагъа тёлеулени компенсациясы эм башхала бардыла.

Кульчаланы Зульфия.
Поделиться: