Кёкде къоркъуусузлукъну унутургъа боллукъду

Россей Федерацияда самолётланы учханларыны къоркъуусузлукъларын унутургъа боллукъду, Промышленность эм сатыу-алыу министерство учакъда экинчи пилотну компьютер бла алышындыргъанды. Быллай хапарланы  телеграм-каналла жазадыла. Аны юсюнден   войнасфейками.рф телеграм канал билдиреди.

 Учакъда экинчи пилотну жалгъан интеллект бла алышындыргъанлары, ол ётюрюкдю. РФ-ни Промышленность эм сатыу-алыу министерствосу керти да къыралгъа керекли затланы сатып алгъан  порталда багъасы 2, 9 миллиард сом болгъан конкурсну юсюнден билдириуню орнатханды. Сёз  анда учакъда экинчи (виртуальный) пилотну юсюнден барады. Болсада аллай технологияланы къурау ишле 2024 жылгъа бошалыргъа керекдиле, аланы сингдириуге андан да кёп заман кетерикди. Специалистлени айтханларына кёре, учакъда бир пилотха кёчюу 2030 жылдан алгъа боллукъ тюйюлдю. Ол тергеуле алыкъа толусунлай тюйюлдюле.

 Бюгюнлюкде, учакъланы кёкде учуулары бла жюрютюлген халкъла аралы жорукълагъа кёре, кабинада эки адам болургъа керекди.  

 Аллай излемле америкалы федерал авиация жорукълада бардыла эм ол рекомендацияла Авиацияда къоркъуусузлукъну жалчытыу жаны бла европалы агентствогъа да берилгендиле. 2015 жылда Germanwings немисли компанияны пилоту Airbus A320 учакъда экинчи пилот кабинадан чыкъгъанлай, эшигин терк окъуна жабып, самолётну алын къаягъа буруп, атдыргъан эди. 

Россейли авиакомпанияла пилотла тургъан кабинада «эки адам» деген жорукъ бла ишлейдиле. Ол сылтау бла  бир-бир экспертле РФ-ни Промышленность эм сатыу-алыу министерствосуну башламчылыгъына артыкъ уллу ыразы болмагъанларын айтхандыла. Алгъын учакъны баш пилоту болуп ишлеген, самолетланы учуру жаны бла сынамлы специалисти Александр Романовну оюмуна кёре, башламчылыкъны иелерини баям авияцияны юсюнден толусунлай ангылаулары болмаз дейди. Учакъда «экинчи виртуальный пилотну» сингдириу къоркъуусузлукъну жалчытхан затланы барысында жалчытмазлыгъы баямды. Не тюрлю жангы технология болса да сынаулу пилотну бир кезиуде да алышындыраллыкъ тюйюлдю дегенди ол.

РФ-ни сыйлы аскер лётчиги, техника илмуланы кандидаты Владимир Поповну айтханына кёре, башда сагъынылгъан технологияны сингдирген этселе да, ал кезиуледе автоматха пилотланы жанындан контроль этмей жарарыкъ тюйюлдю.  

Бизни корр.