КАРДИОЛОГ

«Бир жол, къан басымым кётюрюрлюп, кёзюм-башым тёгерек айланып къыйналама.  Юйдегиле олсагъат терк болушлукъ берген машинаны чакъырадыла.  Келген врачла  мени къатымдан кетмей эки сагъатха дери кюрешедиле. Къан басымымы тюшюредиле. Болсада , больницагъа элтебиз, юйде къойсакъ,  инсульт болургъа къоркъуу барды, деп кардиология арагъа элтедиле. Ол Анда ингирде  ишлеген врач, олсагъат  битеу керекли амалланы этип, палатагъа дери ашырады.  Андан сора да ол  къатыма терк-терк келип, халиме къарап тургъанды»,-деп хапарлагъанды  манга  бир танышым.  Врач а  Ностуланы Карина эди.

Каринаны атасы къабартылы –Гяургиев Арсенди, анасы таулуду. Баш иеси да  таулуду.  Жаш болгъанлыкъгъа, адамлыгъы эм усталыгъы бла да кесин танытханды. Ол Нальчикни Дубки тийресиндеги кардиология клиника больницада  врач болуп ишлейди,  бёлюмню таматасыды.

 -Медицина мени жашауумду. Сёзсюз, ол  ауур ишди, жууаплыды, адамланы инжилгенлерин кёрюп тургъанны айтсакъ да тамамды аны тынч болмагъанын ангылатыргъа.  Докторла анга юйренип къаладыла дейдиле. Алай,  не кёп ишлесенг да, ол затха  тюзелген бек къыйынды. Кимни да билмейме, мен а –алайма . Болсада жангыдан сайларгъа тюшсе, биягъы медицинаны шарт айтханда уа кардиологияны  арсарсыз сайларыкъ эдим,-дейди Карина.

Аны керти айтханына мен аны бла ушакъ этгенимде тюшюннгенме. Ол, саусузларын эсгере,  бирде мудах бола эди, уллу къара кёзлери жилямукъдан толуп, бирде уа жарыкъ ышара эди. «Кёлсюзлюк этген сунмагъыз,- дейди ол, мени  соруулу къарагъанымы кёрюп. –Саусузгъа жюрегинги сезимин билдирирге чыртда жарамагъанын  уста билеме. Не тюрлю кезиуде да ышар, ол анга хошлукъ, ышаныулукъ береди. Алай аны  унамагъанла да бардыла.  Алайды да, биз психологла да болургъа керекбиз»,-дейди Карина.

Ол бакъгъан биринчи саусузун да эсинде тутады. Сексенжыллыкъ  таулу  кишини жашауу Каринаны хайырындан бир ненча жылгъа созулгъан эди.  Къыз къолунда ауушхан саусузун да  эсинден кетералмайды. «Анга тохсан жыл бола эди.  Ол болум, ауруу да хорлагъан эдиле аны, алай  болса да анга болушлукъ эталмагъаныма кесими терслеп тургъанма»,-дейди ол.

Манга  уа, Каринаны юсюнден махтау салып,  газетге  бир  жаз деп  кёпле тилегендиле. Мен аны бла тюбешгенде билгенме анасы Биттирладан болгъанын. Баш иеси Ностуладанды. Ол а  фармакологду. Карина малкъар, къабарты тилледе да бирча иги сёлешеди. «Ол да мени ишимде бек жарайды»,-дейди къыз.

  Къабарты-Малкъар къырал  университетни бошагъандан сора ол кардиология больницада ординатураны Нодар Шардановну башчылыгъында ётеди. Ишге да къызны ол чакъыргъанды. Аны кесини биринчи эмда бек магъаналы устазына санайды. 2002 жылда къыз кардиология клиника больницада врач-ординатор болуп башлайды, 2007 жылдан бери уа къан басымлары кётюрюлгенлеге бакъгъан бёлюмюню таматасыды.

Алай усталыгъын, билимин ёсдюрюуню къоймагъанды. «Алайсыз  жарарыкъ тюйюлдю, кюнден- кюннге жангыдан жангы дарманла, аппаратла, амалла да чыгъадыла. Алгъын  ачыкъларгъа къыйын болгъан аурууну, бусагъатда алгъадан билип, адам кесин сакъларча этер онг барды»,- дейди Карина.

 Аны кюн сайын юйде  эки жашчыгъы сакълайдыла. Ала  экиси да  мектепде окъуйдула. Юч эр кишиге  къараргъа, алагъа заманында аш-суу этип берирге керекди. Анга да къарамай, Карина къыйын саусузу болса  анга эс тапдыргъынчы, кетерге ашыкъмайды. Керек болса, юйюнден да  больницагъа мычымай       жетер.

Ол  кесини коллегаларын да уллу хурмет бла сагъынады. «Бусагъатда  республикалы кардиология арада ишлеген врачла кёп жаны бла устадыла. Къыралны белгили клиникаларындан артха къалмай, жюрекге къаллай операцияны да этерге къолларындан келликди.

Насыпха, кардиохирургларыбыз да бардыла, жарсыугъа, сертификат жокъду. Аны алсала,  мында жашагъанлагъа саулукъларына бакъдырыр ючюн, тышына барыргъа, ахчаларын, заманларын да къоратыргъа керек боллукъ тюйюлдю. Аллай врачладан бири Борукъаланы Исламды. Аны жюрекге не къыйын операцияны да этерге къолундан келеди. Дагъыда  инфарктны,  инсультну жолларын кесер ючюн деп да энчи кабинет ишлейди. Анда доктор пациентлеге  андан ары кеслерин къалай жюрютселе тап боллугъуна, не ашаргъа жарамагъанына не этерге керек болгъанына юйретеди. Ол да бизни ишибизде уллу себепликди.

«Мен кёп врачлагъа тюбегенме, алай Карина Арсеновнача жарыкъ, огъурлу, халал жюрекли уа кёрмегенме. Жаш болгъанлыкъгъа, ишин бек уста биледи. Жюрегим ауруп, больницагъа тюшгенимде, мен сизни врачыгъызма деп келеди.

Мен а ыразы болмайма, бу къызчыкъ не врачлыкъ этерикди деп. Таматагъа барып, тынгылы докторну къолуна бер мени, деп айтыргъа окъуна акъыл  келген эди. Алай бир кесек сёлешгенибизден сора уа терс болгъанымы ангыладым. Артдан-артха уа аны уста болгъанына тюшюндюм. Мени аягъы юсюме ол салгъанды»,-дейди  пенсиячы  Батчаланы Адрахман.

 Бу  врачны юсюнден аллай сёзлени дагъыда кёпле айтхандыла. Ол а къайсы адамгъа да бек уллу намысды, насыпды.