Сыйдам жолла, жашил айрыкамчыкъла, айбат майданла

Къабарты-Малкъар Республиканы 100-жыллыгъына хазырланыу Нальчикде къыстау барады: баш орамлары тапландырыладыла, пассажир транспорт тохтагъан жерледе шёндюгю заманнга келишген омакъ комплексле ишленедиле, шахарны тюрлю-тюрлю мюйюшлеринде жарашдырылгъан солуу майданчыкъла уа жамауатны къууандырадыла. Ишлене тургъан эмда хазыр болгъан аллай объектлени  къауумун КъМР-ни Башчысы Казбек Коков да жокълагъанды.

Ол Канукоев орамда скверде ишле бошала тургъанларын кёргенди. Анда жаяу жолчукъла тапландырылгъандыла, кючню аягъан чыракълары бла чыпынла  салыннгандыла, сабийле ойнарча майдан да жарашдырылгъанды. Кырдык ёзенчикле дайым сугъарыла турурча этилгенди. Кюз артында мында дагъыда талай терек салынырыкъды.

100-жыллыкъны паркына къошуллукъ Абхазия майданда да ишле къыстау бара турадыла. Мында да чыракълы чыпынла алышындырыллыкъдыла, шинтикле салынырыкъдыла, жашил тийреле да айбатландырыллыкъдыла.

«Быллай мадарла Келишиулюкню майданында да этилликдиле. Энди специалистле Россейни бла Къабарты-Малкъарны байракълары тохташдырыллыкъ чыпынны орнатыуну  къолгъа алгъандыла. Байракъланы къууанчлы халда кётюрюу 22 августда – Россей Федерацияны Къырал байрагъыны кюнюнде - ётерикди. Байракъла орнатыллыкъ чыпынланы бийикликлери 35 метрди, къумачларыны ёлчемлери уа  7 х 10,5 метр боллукъду», -деп жазгъанды КъМР-ни Башчысы.