Украина Кърым кёпюрню атдырыргъа Великобританияны Къоруулау министерствосу бла сёлешгенди

Украинаны клечилери Кърым кёпюрню атдырыргъа Великобританияны Къоруулау министри Бен Уоллес бла планла салгъандыла. Аны юсюнден Украинаны Огъаргъы радасыны депутаты Алексей Гончаренко айтханды. Бу билдириуню войнасфейками.рф телеграм-канал жазады.

Ишни болушу уа былайды. Британияда украинлы парламентарийни билдирген сёзлери ётюрюкдюле дегендиле, аны Великобританияны ООН-да келечисини орунбасары Джеймс Кариуки айтханды. Ол дагъыда Киевни бла Лондонну арасында Кърым кёпюрню атдырыр умут бла сёлешиуле болмагъандыла дегенди.

 Кърым кёпюрню атдырыу укрианлы политиклени толмазлыкъ умутларыды эм аны бла байламлы жалгъан хапарланы да тохтамагъанлай айтханлай турадыла.

Июль айда Украинаны Къоруулау министерствосуну Баш тасхачы управлениясыны келечиси Вадим Скибицкийни айтханына кёре, Украинаны Сауутланнган кючлери жарым айрыкамгъа америкалы (РСЗО) HIMARS ракета система бла атдырыргъа боллукъдула. Украинаны президентини кенгешчиси Алексей Арестовични айтханына кёре, ала  Кърым кёпюрню «тюз да техника жаны бла онглары болгъанлай атдырлыкъдыла».

РФ-ни Президентини пресс-секретары Дмитрий Песков украинлы спикерлени кёпюрню юсюнден айтханларын артыкъ эсге алмай, россейли аскерчиле Кърымны тийишлисича къоруулайдыла дегенди.

Политика эм аскер анализ жаны бла институтну таматасыны орунбасары Александр Храмчихинни айтханына кёре, украинлыла Кърым кёпюрге чабыууллукъ эталлыкъ тюйюлдюле. Нек дегенде, аны бек иги  къоруулайдыла. «Кёпюр – ёмюрлеге деп ишленнген тынгылы объектди, аны жаланда атом сауут бла бузаргъа, не да жюзден аслам уллу ракета бла атдырыргъа боллукъду, ала барысы да кёпюрге жетселе. Кесигиз ангылагъандан россейли аскерчиле ол затланы этерге къоярыкъ тюйюлдюле», - дегенди ол.

Бизни корр.