МФЦ-да къагъытланы унутуп кетген эсегиз, Кадастр палатагъа барыгъыз

МФЦ-лада унутулуп къалгъан документле беш кюн озгъандан сора Кадастр палатагъа бериледиле, сакъланырча. Андан а аланы къалай алыргъа боллугъуну юсюнден ведомствода айтхандыла.

2017 жылдан башлап анда ма алай унутулуп къалгъан 50 минг чакълы документ сакъланады. «Ичлеринде бек магъаналыла да бардыла. Гражданла сатыу-алыу келишимлени, закон бла неда осуят этилип мюлкню башха адамгъа къойдургъан свидетельстволаны гражданла керексизге санап, МФЦ-да къоюп кетгендиле. Быллай документле уа артда сунмай тургъанлай изленирге боллукъдула», - дейди Кадастр палатаны районла аралы бёлюмюню башчысы Светлана Тамазова.

Сёз ючюн, сатыу-алыу келишимни керти экземпляры жеринден тепдирилмеген мюлкге иеликге шагъатлыкъ этерикди. Осуят этилип берилген аллай эркинликни туура этген свидетельство уа мюлкден юлюш алыргъа сюйгенле чыкъсала изленирикди.

Кадастр палатагъа берилген быллай документле бир заманда да къурутулмайдыла, иелери алгъынчы сакъланып турлукъдула. Ала кеслери да документлерин тас этген сунмай, МФЦ-да унутуп кетгенлерин эслерине тюшюрселе. Аны себепли ведомствода бу ишни болжалгъа салмай, къагъытларыгъызны кесигизге алыгъыз деп чакъырадыла.

Гражданлагъа тап болурча, юйге аланы курьер келтирирге боллукъду. Алай этерча заявление жазып берирге тийишлиди. Сюйсегиз 8 8662 93-00-17 неда 8(800)100-34-34 номерлеге сёлешип, сюйсегиз а filial@07.kadastr.ru электрон почтагъа жазып. Бир да болмаса, Кадастр палатаны кесине барыгъыз. Аны адреси ма буду: Нальчик, Тургенева, 21а.

Заявка берилгенден сора ведомствону ишчиси сизге сёлешип, документни къайры эмда къачан келтирсе тап боллугъун сорлукъду. Курьерге хакъ тёлерге тюшерикди: гражданла – 500, организацияла уа 900 сом берликдиле. Уллу Ата журт урушну ветеранлары эмда анда сакъат болгъанла, 1 эм 2 къауумланы санына кирген сакъатла, сакъат сабийле эмда туугъанлы да къыяулукълары болгъанла тийишли документлерин кёргюзтселе, ол тёлеуден эркин этилликдиле. Тарифле Росреестрни П/364-22 номерли буйругъу бла тохташдырылгъандыла.