Минги таугъа – жангы рекордла ючюн

Таулада чабыуну сюйгенле Минги тауда онунчу «Alpindustria Elbrus Rase» фестиваль бардырылгъанды. Республиканы курортда эм туризм министерствосундан билдиргенлерича, анга 1400-ге жууукъ адам къатышханды.

Спортчула он дистанциягъа чапхандыла, эсепле «Эр кишиле», «Тиширыула» эм «Юниорла/сабийле» къауумлада айырылгъандыла. Тёрт жюз чакълы бир адам «Гара-Баши» дщистанцияны сайлагъандыла, ол эм къысхады, сора,  алыкъа сынам жыймагъан, неда теркликни сюйгенлеге тапды. Тауну тёгереги бла уа тийишлисича хазырлылыкъны ётген 100-ге жууукъ инсан сайлагъанды. Ала бийик тау болумлада 127 километрни, чыранлагъа, череклеге, къаялагъа тюбей ётгендиле. 13-15-жыллыкъла километрни, 6 жыллары толмагъан сабийчикле уа 500 метрни ётгендиле.

Эм къыйын дистанцияда Краснгорскдан Артём Ростовцев хорлагъанды, ол белгиленнген 127 километрни 22 сагъатдан аз заманнга чапханды. Тиширыулада Новосибрскден Александра Худякова къытханды, аны рекорду 24 сагъат 48 минут бла 20 такъыйкъа болгъанды. Къалгъан дистанциялада эм терк Никита Филиппов, Елена Рухляда, Дмитрий Брегеда, Олеся Рязанова, Сергей Лаптев эм башхала чапхандыла.

Фестиваль тёрели халда жыл сайын къуралады.

 

Кульчаланы Зульфия.
Поделиться: