Спортда жетишимле саулукъну кючлендириуден башланадыла

Тырныауузда, саулай Элбрус районда да физкультурагъа не заманда да уллу эс бёлюннгенди. Шахарда «Геолог» эм «Бахсан» спорт комплексле ачылгъанлы уа жарау этерге сюйген сабийлени, абаданланы да саны бютюн кёп болгъанды. Ала спорт заллагъа къарыу алыр, саулукъларын кючлер муратда келгендиле. Алай аланы асламысы эришиулеге къатышыргъа, жетишимли болургъа итиннгенледиле.

Бюгюнлюкде Тырныауузда олимпиада резервли эки спорт школ ишлейди, районну эллеринде аланы бёлюмлери ачылгъандыла. Жараулагъа жюрюгенлени саны 1800-ге жетеди.

Ала кёбюсюнде спортну кюч тюрлюлерин – грек-рим тутушууну, боксну, каратени, ауур атлетиканы эм башха единоборстволаны – сайлайдыла. Футболдан, волейболдан, спорт гимнастикадан секцияла, тренажёр залла да бош турмайдыла. Физкультура-асламлы иш бла билим бериу учрежденияланы 5 мингнге жууукъ окъуучулары, Элбрус регион колледжни студентлери да кюрешедиле.  
Жарауну бардыргъан тренерле 60-ха жууукъдула, ала квалификацияны ётгендиле, уллу сынамлары болгъанла, «Россейни сыйлы тренери» деген атны жюрютгенле да бардыла. Алай бла районну гёжефлери даражалы эришиуледе хорлагъанлары сейир тюйюлдю.  

Районну спорт жаны бла башчылары физкультура-асламлы ишни тийишлисича къураугъа сакъдыла. Спорт эм битеулю билим берген мектепле, аскер комиссариат, ДОСААФ-ны жер-жерли бёлюмю бла бирге башха-башха жыл санда аслам сабийни къатышдырыу жаны бла да кёп тюрлю ишле къурайдыла. Комитетни башчысы Жаппуланы Магомет билдиргеннге кёре, быйыл да Тырныауузда иги кесек эришиу ётдюрюлгенди. Ол санда ауур атлетикадан бла каратеден къызланы бла жашланы араларында КъМР-ни биринчилиги, жашланы араларында каратеден СКФО-ну биринчилиги. 

Дагъыда грек-рим тутушуудан районну спорт школуну алгъыннгы директору Сабанчыланы Расулну, боксда атын айтдыргъан Доттуланы Ахматны хурметлерине турнирле къуралгъандыла. Жаш ауур атлетчиле жай спартакиаданы экинчи кесегинде сынашхандыла. Ол да Ностуланы Хажи-Муратха жораланнганды. Шахарда, элледе да спортну бла саулукъну онкюнлюклери, «Зауукълу стартла», гитче футболдан бла волейболдан эришиуле бардырылгъандыла. Районда ётдюрюлген турнирлеге 1330 спортчу къатышханды. 

Спорт школлада жарау этгенле 2022 жылны биринчи жарымында 46 регион, битеукъырал эм халкъла аралы эришиуде къарыуларын сынап кёргендиле. Грек-рим тутушуу бла кюрешгенлени араларында Локияланы Жамболат къууандыргъанды, ол Россейни чемпионатында кюмюш майдал къытханды. Къыралны 18 жыллары толмагъан гёжефлерини араларында чемпионатында экинчи жерге Локияланы Руслан чыкъгъанды, СКФО-да уа Кациланы Абдурахман хорлагъанды. 

Ауур атлетикада да кёл этдирирча жетишимле бардыла. Аслан Каскулов Россейни кубогунда экинчи болгъанды, Гюлюйланы Тамерлан бла Къадырланы Махмут къыралны биринчилигинден «доммакъла» бла къайтхандыла. Алина Малухова, округда ючюнчю болуп, спортну устасыны мардасын толтургъанды. Россейни каратеден кубогунда эм кючлюге Вера Ковалева саналгъанды. «Кубок АК-Барс» эришиуден «алтынны» Керим Алихаджиев келтиргенди, Эльмира Хаджарова уа ючюнчю жерге чыкъгъанды. Боксдан «Юность России» чемпионатда эм кючлю Макытланы Хасан болгъанды, «кюмюшню» Гыжгыланы Юсюп алгъанды. 

Быйыл спортну устасына кандидатланы санына да къошулгъанды, нормативлени грек-рим тутушуудан Кациланы Абдурахман, ауур атлетчи Жаппуланы Тамерлан, каратечи Эльмира Хаджарова толтургъандыла. Асламлы разрядла 8 ауур атлетчиге бла жети баскетболчугъа берилгендиле. 

Жай – солууну бла юйрениу-жарау этиу жыйылыуланы кезиуюдю. Алда спортчуланы жангы жууаплы эришиуле сакълайдыла, гёжефлерибиз алада жетишимли болурларына да ийнанырчады. 

Анатолий ТЕМИРОВ.
Поделиться: