Украина Херсонну артха къайтарлыкъды

Украина, чабыууллукъ этип, Херсонну артха къайтарлыкъды. Аны юсюнден ол къыралны оноучулары бир ненча кере билдиргендиле: президент Владимир Зеленскийден башлап украинлы аскер экспертлеге дери. Украинаны аскерчилери Херсонну аллыкъдыла деп тыш къыраллы асламлы информация органла да жазып тургъандыла, деп билдиреди войнасфейками.рф телеграм-канал.

Бу билдириу жалгъан хапарды. Аллай заявленияла июль айдан бери жайылгъанлай турадыла, болсада украинлы аскерчиле Херсонну артха къайтарыргъа умут этгенлерини белгиси жокъду. Августну аллында уа Украина быйыл Херсон жанында тюрлениуле боллукъ тюйюлдюле дегенди. Бюгюн а Зеленскийни администрациясыны башчысыны кенгешчиси Михаил Подоляк жууукъ заманда Украинаны Сауутланнган кючлери Херсоннга чабыууллукъ этерикдиле деген хапарла «информация эм психология жаны бла бардырылгъан операцияны» бир кесегиди дегенди.

 «Сёзсюз, бюгюн битеу жамауатха этилген билдириуле ала информация эм психология жаны бла бардырылгъан операцияны юсю бла жайыладыла. Биз неда этип россейли аскерни психологиясын сындырыргъа керекбиз. Бизни урушубуз башхады, информация жаны бла уруш, аны шуёхларыбыз кёредиле», - дегенди Подоляк Великобританияны ВВС телекомпаниясына.

Киев Херсоннга айланып артха чабыууллукъ этерикди деп, биз июль айны ортасында жазгъан эдик. Украинаны ол чабыууллукъну этерге аллай бир адамы, техникасы эм башха ырысхысы жокъду. Ол шартха украинлы эм тыш къыраллы специалистле да эс бургъандыла.

Кертисин айтханда, Украинаны болдургъан «хорламларыны» асламысы психология жаны бла бардыргъан операциясыны хайырынданды. Ётюрюк хапарла тохтамагъанлай асламлы информация органлада жайылгъанлай турадыла. Украинаны Сауутланнган кючлери Запорожьеде болгъан атом электростанцияны атдыргъанда, аны россейли аскерчилеге атагъандыла. Андан сора да, Донецкге пехотагъа къажау минала атханда неда Днепр сууну юсю бла ишленнген Антонов кёпюрню ракетала бла ургъанда да ол муратлары болгъанды эм РФ-ни Сауутланнган кючлерине кёпюр бла жюрюмезча чырмаула салыргъа кюрешгендиле. Ол чабыууллукъланы баш мураты - телевизоргъа къараучуланы, украинлы эм тыш къыраллы прессаны Украинаны Сауутланнган кючлерини «къаллай уллу эм бюгюлмеген кючю» болгъанын билдириргеди, эслеп къарагъанда уа, кючю ахырда жокъду. 

Июль айда телеграм-каналланы Украинаны президентини администрациясына таяна жазгъанларына кёре, Херсон ючюн информация урушну бардыргъанларыны магъанасы - «Запад къыралланы жамауатыны оюмун тюрлендирирге эм Украинагъа билеклик этген халкъланы санын кёбейтирге». Башхача айтханда, украинлыла тыш къыралладан кезиулю ахча болушлукъну эм аскер сауутну  алыргъа ашыгъадыла, ол сауут а интернет тюкенледе сатылып турады.

Бизни корр.