Эм кючлю спортчуланы бирикдирликди

Россейде спортну жай тюрлюлеринден спартакиада башланнганды, ол 10 августдан 2 октябрьге  дери бардырыллыкъды. Анга къатышырыкъланы, къараучуланы да къыралны Правительствосуну башчысыны орунбасары Дмитрий Чернышенко бла спорт министри Олег Матыцин алгъышлагъандыла.

Дмитрий Чернышенко Президент Владимир Путинни спортчуланы эришиулеге хазырлылыкъларын сакъларгъа, турнирлени жангы тюрлюлерин къураргъа кереклисини юсюнден сёзлерин эсгертгенди. «Эм кючлюлени спартакиадасы аллай турнир боллукъду. Спортну 39 жай тюрлюсюнден эришиуле 12 регионда ётдюрюллюкдюле. Алагъа 9 мингден аслам умутландыргъан атлетле  къатышырыкъдыла, аланы араларында Олимпиада оюнланы, дунияны бла Европаны, битеуроссей турнирлени чемпионлары бла призёрлары боллукъдула. Быллай уллу башламчылыкъ профессионал спортну байрамына айланырына ишексизме. Ол бютюн кёп россейлини спорт бла дайым кюреширге кёллендирине да ийнанама», - дегенди Дмитрий Чернышенко.

Олег Матыцин да боллукъ эришиуле 2022 жылда ата журтлу спортда баш магъаналы ишге саналгъанларын белгилегенди. Ол айтханыча, спартакиада эм кючлю гёжефлени, атлетлени, фахмулу жаш тёлюню, специалистлени бла экспертлени, культура бла спортну сюйген битеу адамланы бирикдирликди.

Бу эришиуледе жангы рекордла тохташдырыллыкъдыла, аланы къууанчлы халда ачылыулары уа Москвада «Мегаспорт» арада боллукъду, деп билдиредиле  республиканы Спорт министерствосундан.

 

Кульчаланы Зульфия.
Поделиться: