Сатыу-алыуну кенгертиу – импортну алышындырыуну амалларындан бири

КъМР-ни Башчысында Экспорт советни бу кюнледе болгъан жыйылыуунда  аны ишини эсеплери чыгъарылгъандыла. Анда белгиленнгенича, республикабыз 66 къырал бла сатыу-алыу  байламлыкъла жюрютеди, аны бла бирге экспорт жаны бла жумушланы 32 къырал бла бардырады. Къабарты-Малкъардан экспортну 83 проценти чакълы бири СНГ-ни къыралларына барады. Тышына асламысында аш-азыкъ товарла, темир эмда андан этилген затла, машинала ишлеуге керекли продукция, химия промышленностьну продукциясы, агъач жибериледиле.

Аладан сора да,  мирзеу, татлы ашарыкъла, бишлакъла, ичгиле, суусап суула, нартюх крахмал, мал ашла, къыймала, этден хазырланнган затла, тахта кёгетледен консервала  да экспортда иги кесек жерни аладыла. «Халкъла аралы корпорацияны айнытыуну мадарлары» эмда  «АПК-ны продукциясыны экспорту» деген регион проектле да жашауда жетишимли бардырыладыла. 

 Болсада, бюгюннгю болумлада – экономиканы къыйын кезиуюнде, санкцияла къысыулукъ этип тургъанда, продукцияны сатарча жангы жерле керекдиле, географиясын кенгертмей жарарыкъ тюйюлдю деп, Экспорт советге къатышханла бир аууздан айтхандыла. Ол а импортну алышындырыугъа да бек магъаналы болгъанын чертгендиле.

«Мой экспорт»деген  цифралы комплекс тыш байламлыкълагъа уллу себеплик этеди. Сёз «Бир терезе» деген информациялы системаны юсюнден барады. Ол  бизнесге онлайн халда  къырал эмда башха жумушлагъа жолну ачады, тыш рынокланы халларын, башха къыралланы бизнесменлери бла байламлыкъланы энчиликлерин билирге, алыучуланы табаргъа, жангы поставщикни сайларгъа, керекли документлени жарашдырыргъа эм кёп башха жумушланы тындырыргъа болушады. Бюгюнлюкде «Бир терезеде» 31 сервис ишлейди, 2024 жылгъа дагъыда 30 ачыллыкъды.

Жыйылыуда сёлеше, КъМР-ни Башчысы Казбек Коков былай айтханды: «Россейли экономиканы шёндюгю болуму, санкцияла бла къысыулукъ этиу саулай дунияны экономикасында хал да мюлк жюрютюуню жангы амалларын излейдиле. Жангы рынокла, башха тюрлю мадарла табаргъа керекди. Шёндю бек алгъа логистика бузулгъаны ючюн, кёп тыйгъычла тюбейдиле, алай жангы онгла да иги кесек бардыла. Биз  битеу болгъан илму, кадрла эмда производство онгланы не къадар толу хайырланыргъа керекбиз. Бизни уллу экспорт онгларыбыз бардыла, ол санда эл мюлкде, промышленностьда, туризмде да. Россейни Президенти, Петербургдагъы халкъла аралы экономика форумда сёлеше туруп, Россейни бла аны экономикасыны айныууну баш жорукъларын белгилегенди. Аладан бек биринчиси – ачыкълыкъды.

 «Чынтты жалынчакъсыз къыралла тенгиткде мурдорланнган халланы сайлайдыла, битеулю айныугъа юлюшлерин къошаргъа итинедиле. Россей башхаладан айырылыуну бир заманда да унарыкъ тюйюлдю, бизни бла ишлерге сюйгенлени барысы бла да байламлыкъланы кенгерте барлыкъды», - дегенди къырал башчы.

Экинчи эмда ючюнчю жорукъла уа, эсигизде эсе, быладыла – предпринимательлик эркинликле эмда жууаплы, бирге келишген макроэкономикалы политика. Биз аланы толусунлай толтурлугъубузгъа, алай бла производствода, экспортда, адамларыбызны жашауларында да жангы даражагъа чыгъарыгъыбызгъа ийнанама».