Кеси – гитчечик, хайыры уа – уллу

Къабарты-Малкъарда СберМедИИ компанияны  диагностиканы бардыргъан «Цифралы ФАП»  мобил аппаратын  сынарыкъдыла. Ол  фельдшерлени бла врачланы ишлерине ахшы себеплик этерикди. Аны биринчи заманда Прохладныйни ара больницасында ишлетип кёрлюкдюле. 

КъМР-ни саулукъ сакълау министри Рустам Калибатов  айтханнга кёре, жангы технологияны хайыры бла   диспансеризацияны тири бардырыргъа, къан басымлары, диабетлери эм башха къыйын ауруулары болгъанланы  халларын юйлеринде тинтирге да  онг табыллыкъды.   Аны эсеплерин электрон халда профильли специалистге жиберир эмда телемедицина бла  эсгертиу алыр ючюн жаланда интернет неда Wi-Fi керек боллукъду.

«Цифралы ФАП» диагностика оборудование гитче кейсге сыйынады. Аппаратха   электрокардиограф, тонометр, анализаторла,   термометр эм пульсоксиметр киредиле. Ол Росздравнадзорда регистрацияны ётгенди.   

- Аппарат-программа комплексни хайырланыу биринчи медицина болушлукъну  эм  диспансеризацияны качествосун ёсдюрюрге ахшы  себеплик этерикди.  Жалгъан интеллектни мурдорунда ишлеген  скрининг  система уа  аурууну заманында  ачыкъларгъа болушурукъду, иги кесек саусузну жашауун  сакълатырыкъды,-  дейди   СберМедИИ цифралы медицина диагностика араны (MDDC) баш врачы  Наталья Филимонова. 

Сбербанкны Къабарты-Малкъарда бёлюмюню таматасы Залина Бейтуганова финанс учреждение республиканы  цифровизациясына тири къатышханын,  социал магъаналы  бёлюмлени, ол  санда саулукъ сакълауну айнытыргъа уллу къошумчулукъ этгенин да   билдиргенди.  «Цифралы ФАП» узакъ  районлада жашагъанлагъа эм тау жерледе солугъан  къонакълагъа къысха заманда тюз диагноз салыргъа неда  профилактика халда кеслерине къаратыргъа онг тапдырлыкъды.