Таула алгъа неден да багъалыдыла

Чегем ауузуну табийгъатыны ариулугъуну юсюнден кесини репортажында «Моя провинция» деген 23-чю Битеуроссей конкурсха къатышхан Гульнара Мурзина да жазгъанды. Ол «Пресса» деген номинацияда бек сыйлы саугъагъа тийишли болгъанды. Автор Белебей шахарданды. Биринчи жерге тийишли болгъан статьяны уа кесинде «Московская правда» газет басмалагъанды. 

«Бу жерледе жашагъанла ата-бабаларындан келген тёрелеге кёре жашайдыла. Ташла юслеринде юйле ишлейдиле, къол усталыкъларына уа кёпле да сукъланадыла. Малкъарлыла 13 жыл кёчгюнчюлюкню сынап бери къайтханларында, алагъа тюзледе къалыгъыз, мында жашау тынчыракъды деп да кюрешгендиле. Алай ала сюйген тауларын башхагъа алышыргъа унамагъандыла. Мени ушакъ нёгерим Маринаны ата-анасы анга юлгюдюле. Аны къоллары ишден бла кюнден къаралыпдыла. Мени бла сёлеше, ол эшиуюн тохтатмай бардырады. Ол аны юйреннген жумушуду. Эшген жаулукъларын а ол жайып, Чегем чучхурлада сатады. Эри Эскандер бла 3 къыз бла бир жаш ёсдюргендиле. Беш ийнек бла 50 эчки тутуп, кеслерин жау, сют, жюн бла жалчытадыла. 

Бизни экскурсоводубуз Анна айтханнга кёре, былтыр таулада ташла тюшюп, жол жабылгъан эди. Сора бу жанында туристле къалгъан эдиле. Эллиле аланы ач этмей, аш-суу жарашдырып, сыйлап тургъандыла. Малкъарлыла бек сюедиле къонакъны эм къачан да ариу кёзден къарайдыла.

Сора мен Хадис бла танышдым. Ол да кеси къолу бла ишлеген сейир затла эм эски юй керекле сатады. Ушагъыбызны кезиуюнде жарсытхан затларыны юсюнден да айтханды. Бек биринчиси, туристле тёгерекни кир этип кетгенлериди. 

 — Биз ёсюп келген тёлюбюзге не зат къоярыкъбыз, былай барса?- дейди ол.

Кертиси бла да, тёгерек-башда сыннган мияла, бош шешала, целлофан пакетле… Жарсытады быллай уллу кёллюлюк.

Болмагъанча аламат эсгериуле кьалгьандыла мени эсимде Къабарты-Малкъардан. Тауладан а - бютюнда!"