Танг кесек жол жангыртылады

Быйыл Къабарты-Малкъарда «Къоркъуусуз эм качестволу автомобиль жолла» миллет проектге «Эл жерлени комплекс халда айнытыу» къырал программагъа «Регион, район эм жер-жерли магъаналы  автомобиль жолланы айнытыугъа себеплик этиу»  федерал проектге кёре эм регионну жол фондундан бёлюннген ахчагъа 170 километр чакълы жол жангыртыллыкъды. Аны юсюнден бизге КъМР-ни Транспорт эмда жол мюлк министерствону пресс-службасындан билдиргендиле.

Алай бла «Эл жерлени комплекс халда айнытыу» къырал программаны чеклеринде – Элбрус, Черек, Май эм Терк муниципал районлада  тынгылы ремонт этилирге керек сегиз объектден бешисинде ишлени болжалындан алгъа тамамларгъа онг табылгъанды. Саулай 5 километрге жууукъ жерге къараллыкъды. Аны бла бирге «Эл жерлени комплекс халда айнытыу» къырал программагъа кёре, Бабугент,  Кёнделен Урух, Ново-Ивановское, Интернациональное элледе да  жолланы игилендиредиле. Ол санда мурдорларын кючлеп, асфальт жайгъандыла, жауун суу саркъырча арыкъла эм жорукъланы билдирген белгиле да салыннгандыла. Сагъынылгъан проектни чеклеринде Экинчи Чегемде бла Урухда къыстау жолланы жангыртадыла. Биринчисинде 3,8 километрде жолгъа асфальт салып бошай турадыла. Подряд организация улоу тохтарча комплексле эм тротурла да ишлеп кюрешеди. Республикадан берилген субсидиягъа уа 11 километр чакълы бирде районлада бла шахар округлада онюч жолгъа къараллыкъды. 

КъМР-ни Башчысы Казбек Коковну буйругъу бла Тырныауузда Отар эм Гызы улу орамлагъа, саулай алып айтханда, 2 километрге   тынгылы ремонт этилгенди. Ишлени кезиуюнде жолгъа жангыдан бордюрла тизгендиле, асфальт жайгъандыла, улоу тохтагъан комплекслени жангыртхандыла эм белгиле да салгъандыла.

Зольск районда да подряд организацияны келечилери Залукокоажени ара орамына бардюрла салып, эки къат асфальт жайып, тротуарланы жарашдырып, белгилени орнатып бошагъандыла. Ишлени кезиуюнде орам кече жарыкъ болурча да мадар этилгенди. Аны бла бирге Герменчикде, Звёздныйде, Исламейде эм Бахсанда жолла да жангыртылгъандыла эм мардалагъа келиширча этгендиле. Бусагъатда тынгылы ремонт ишле Терек бла Майский шахарланы ара орамларында да барадыла. Эки участокда да светофорла, тротуарла эм улоула тохтагъан комплексле жангыртыллыкъдыла. Кече жарытырча чыракълы чыпынла салынырыкъдыла эм жашиллендирирча мадар этилликди. 

 Андан сора да, регион жол фондну себеплиги бла Нальчикде Къулий улу эм Ленин атлы проспектлеге тынгылы ремонт этиледи. Ишлени кезиуюнде жолланы эки жанында да тротуарлагъа плитка салынырыкъды, эки къат асфальт жайыллыкъды. «Таза кёк» программагъа кёре  кече жарытырча  этилликди эм тёгерек-баш жашиллендирилликди.

Саулай алып айтханда, «Эл жерлени комплекс халда айнытыу» къырал программагъа эм регион жол фонд  муниципалитетле бёлген субсидиялагъа 36 километрге  жууукъ жолгъа тынгылы ремонт этилликди.