Къабарты-Малкъарны рейтинги кётюрюледи

РФ-ни Экономиканы айнытыу министерствосу озгъан жылда къыралны регионлары къырал жумушланы электрон амал бла тамамлауну юсюнден билдириуню этгенди. Аны итогларына кёре Къабарты-Малкъар Республика къырал эм муниципал жумушланы электрон амал бла тамамлауда кёрюмдюлерин 17 тизмеге игилендиргенди, башхача айтханда, 51 жерден 34 жерге кётюрюлгенди.

Шимал-Кавказ федерал округну субъектлерини арасында Къабарты-Малкъар Республика тизмеде Ставрополь крайдан сора экинчи жерде тохтагъанды. Рейтингни жарашдыргъанда, жумушланы тамамлауда аланы качестволарына эм не халда берилгенлери эсге алыннганды. Аланы ичинде къаллай жумушла тамамланнганлары, къагъытланы узакъгъа созмай жарашдырыу, заявлениягъа къачан къарагъанларыны, ол не халда болгъаныны юсюнден энчи кабинетни юсю бла кёрюрге амалны къурау эм учреждениягъа жюрюуню къысхартыу дегенча затланы эсге алгъандыла.

 Регион эм муниципал жумушланы тизмесине, аланы юсюнден мониторинг бардырылгъанды, энчи адамланы эм предпринимательлени араларында аслам суралгъан социал магъанасы болгъан, къырал порталда басмаланнган жумушла саналадыла.

 Келир жылдан тебиреп РФ-ны Экономиканы айнытыу министерствосу къырал эм муниципал жумушланы 24 сагъатны эм  жети кюнню ичинде тохтаусуз тамамлап туруугъа кёчюу бла байламлы Концепцияны жашауда бардырыр муратда мониторингни автоматизированный халда бардырып турлукъду, деп билдиргендиле КъМР-ни Экономиканы айнытыу министерствосуну пресс-службасындан.

Бизни корр.