Кадастр инженерле кимледиле, кеслери да не бла кюрешедиле?

Бу специалистлени ишлерини, аласыз къайсы жумушланы тындыргъанда болмазлыгъыны юсюнден Къабарты-Малкъар Республиканы Кадастр палатасында айтхандыла.

Кадастр инженер – жеринден тепдирилмеген мюлкню кадастр ишлерин тамамлайды. Аны ахыры уа неди десегиз – быллай мюлкню къырал эсепге салырча неда андан чыгъарырча документлени хазырлауду. «Аны бла кюрешген специалистле энчи предприниматель болургъа неда организацияда урунургъа эркиндиле. Къалай-алай болсада, ала СРО-гъа къатышыргъа борчлудула. Ол дегеним неди: СРО деп ишин кеси тийишдирген организациягъа айтадыла», - дегенди Палатаны башчысы Анна Тонконог.

СРО-гъа киреме дегенлеге талай излемле бардыла. Эм биринчиден, инсан Россей Федерацияны гражданы болургъа керекди. Ызы бла ол усталыкъдан бийик билимли, кесини да аллай инженерни болушлукъчусуча эм азындан эки жыл сынамы болургъа тийишлиди. Организациягъа кирген сагъатда экзамен бериледи. Ол инсан граждан жууаплылыкъны борчлу халда страхованиясын этерге керекди. Къырал кадастр эсепге салыу законодательствогъа ары дери бузукълукъ этгенлени уа экзаменнге къоймадыла.

Кесини ишин бардыргъанда, кадастр инженер жеринден тепдирилмеген мюлкню эсепге салырча неда аны андан чыгъарырча документлени хазырлайды. Анна Тонконог айтханнга кёре, жер участканы чеклерин тохташдырама дегенде, мюлкню къагъытларында халатла табылгъанда да быллай специалистни чакъырмай боллукъ тюйюлдю. Аны себепли кадастр инженерни иги эс буруп сайларгъа керекди.

Росреестрни сайтында быллай специалистлени тизмеси барды. Анда аланы юслеринден хар нени да билирге боллукъду, ол санда къайсы СРО-гъа киргенлерин, аттестатларыны номерлерин, реестрге къачан тюшгенлерин. Инженерни аттестаты сыйырылып эсе, ол анда бек терк кёрюнюрюкдю.

Кадастр инженерле берген жумушланы качествосун игилендирир умутда Федерал Кадастр палатаны сайтында «Корпоративный университет» деген онлайн-платформа жарашдырылгъанды. Къыралны алчы вузларыны преподавательлери анда билим бередиле, видеолекцияла да бардырыладыла. Онлайн-вебинарлада тийишли законодательствода тюрлениулени юслеринден хапарлайдыла, ишде тюбей тургъан чурумладан къутулур амалла изленедиле.