Жолла тап, къоркъуусузлу, жангыртыла барадыла

Быйыл республиканы автомашина жолларында къадар иш этиле барады. Барыбыз да кёргенибизча, шахарлада, элледе транспорт инфраструктура жангыртылады, эски асфальтны орунуна жангысы жайылады, чыракъла, белгиле орнатыладыла. КъМР-ни Транспорт эмда жол мюлк министерствосунда айтханларыча, ала «Къоркъуусузлу эмда качестволу автомашина жолла» деген миллет проектни чеклеринде бардырыладыла.

Бу кюнлеге Урван, Прохладна эмда Черек районлада ишле тамам этилип бошалгъандыла. Бу проектни чеклеринде хайырланыугъа битеуда онтёрт объект берилгенди. Онбеш муниципалитетде 55 километр жолла жангыртылгъандыла. Псыхурей, Плановское элледе, сора дагъыда Хушто-Сыртдан башлап, Чегем чучхурлагъа дери жолда чыракъла орнатылгъандыла. Ол бары да онжети километр болады.

Къырал келишимле аллындан окъуна этилгенлери себепли бу ишле жаз башында тюз кюн онг бергенлей башланнгандыла. Аны хайырындан бюгюнлюкге кёбюсю тамам этилгенди. Шёндю уа Чегем, Лескен, Бахсан, Терк эмда Элбрус районлада мадар этиле турады. Нальчик шахар округда уа подряд организацияла Шогенцуков атлы эмда Къабарты орамланы къазауатда жангыртадыла.

Министерствода айтханларыча, Зольск районда ишле эбине жете турадыла, бу айны ахырына дери жолчула эки объектни берликдиле хайырланыугъа. Ала жангы асфальт жайгъандыла, тротуарланы жарашдыргъандыла, Мылы Золка сууда кёпюрге да ремонт этип башлагъандыла. Ахырында жолланы жанларында буруула эмда белгиле орнатырыкъдыла.

Ишле терк этилгенлери ючюн аланы качествосу тапсыз болмазына министерствону келечилери кёз-къулакъ боладыла. Ала проект документацияны аллындан окъуна сюзедиле, асфальт жарашдырыучу заводлагъа къарайдыла, хайырланыллыкъ материаллагъа эмда технологиялагъа кёз жетдиредиле. Ахырында уа комиссия къурап, объектни тынгылы тинтедиле. Иш алай баргъаныны хайырындан жолла бек тап боладыла.

Качество дегенни айтханда, регионну Жол мюлк управлениясыны тийишли лабораториясыны ишини юсюнден да сагъыныргъа керекди. Аны специалистлери быллай ишлени кезиуюнде жайылгъан асфальтны бир кесегин алып, кеслеринде лабораторияда тинтедиле, материал битеу белгиленнген мардалагъа келишгенин бла келишмегенин тохташдырадыла. «Биз аны бла дайым кюрешебиз. Жол тап халда неллай бир заман турлугъун асфальтны бёкемлиги кёргюзтеди», - дегенди ведомствону контроль бёлюмюню башчысы Ахматланы Алим.

Алай бла лабораторияны адамлары ол жангыртыла тургъан объектлени барына да кёз жетдиргендиле. Белгиленнген нормативлеге бузукълукъ этген абери тапмагъандыла.

Жолланы жангыртханда, аланы кече жарыкъ этерге кереклисине да эс бурулады; эм биринчиден ол таплыкъды, къоркъуусузлукъгъа да себепликди. Къоркъуусузлукъ дегенде, бурууланы хайырындан ол да кючлюрек бола барады. Быйыл аллай затладан битеуда 8,6 километрде орнатыргъа умут барды да, бюгюнлюкге 5,3 километринде иш тамам этилгенди.  Дагъыда шёндюгю стандартлагъа келишген оналты пешеход переход жарашдырылгъанды.

Чыракъланы юсюнден айтханда уа, быйыл кече жарытылгъан жолланы узунлугъу 32 километрге кёбюрек боллукъду. Тийишли ишле талай элде эмда Нальчик шахар округда барадыла. Аланы чеклеринде специалистле светодиод чыракъла орнатадыла.