Орус тилни къалай билгенлерин ачыкълагъандыла

Билгенибизча, быйыл Бир къырал экзаменлени мурдорлу кезиулери 26 майдан 21 июньнга дери бардырылгъанды. Орус тилден а сынаула эки кюннге юлешинип озгъандыла – 30 эмда 31 майда. Бу урумда, энчи Нальчикни школларын алып айтсакъ, жетеулен ишлерин 100 баллагъа жазгъандыла.

Эсигизге салайыкъ, шахарны бир-бир предметлени терен халда окъутхан тогъузунчу номерли школдан аланы санында ючеулен болгъандыла – окъуучула Алим Эристов, Самира Жанказиева, Аиша Закураева. Аланы устазлары Ностуланы Сакинат Тенгизовнады.

Кумыкова Милана уа 24-чю школну тауусханды. Аны бу дерсге Роза Абдулаховна Кандурова бла Фатима Абдулкеримовна Азизова тюшюндюргендиле. Камилла Жемухова уа 17-чи мектепни окъуучусуду. Ол а кесини жетишими ючюн устазы Байдаланы Раиса Ахматовнагъа ыразылыгъын билдиреди. Онючюнчю номерли гимназиядан Беслан Савкуев да 100 балл алгъанланы санындады.

Сынауну орус тилден эм бийик баллгъа дагъыда жазгъан а онтёртюнчю гимназиядан Хаджиланы Ренатды. Ол быйыл алыкъа онунчу классны тауусханды. Экзаменни уа алгъадан берип кёрюрге кёлленнгенди эмда ышаныулугъу аны алдамагъанды. Ол устазлары Елена Владимировна Дерюгинагъа бла Вера Дмитриевна Калмыковагъа анга билимни магъанасын ангылатханлары ючюн ыспас этеди.

Бир къырал экзаменни мурдорлу кезиуюнде угъай, анга къошакъ халда бёлюннген кюнледе бергенле да бардыла. Ол урумда да 100 баллгъа тийишли окъуучу болгъаны къууандыргъанды.

Бу жол орус тилни иги билгенин 27-чи номерли мектепден Дамира Бербекова ачыкълагъанды. Ол хар заманда да хунерли болгъанын кёргюзтгенлей келеди. Сёз ючюн, биологиядан былтыр окъуучуланы битеуроссей даражалы олимпиадаларыны регион урумунда айырмалы болуп, Казбек Коковну премиясы бла саугъаланнганды. Быйыл да бу олимпиаданы шахардагъы кезиуюнде хорлагъанды. Шимал Кавказны школчуларыны биологиядан быллай эришиулеринде уа экинчи жерге чыкъгъанды.