Гёжефни жетишимлеринде тренерни къыйыны уллуду

Кёп болмай Тыва Республиканы Къызыл шахарында эркин тутушуудан Россейни чемпионаты бардырылгъанды. Анда алтын майдалны Шауаланы Малик (79 кг.) алгъанды, «кюмюшлени» Анзор (70 кг.) бла Азамат (92 кг.) Закуевле къытхандыла. Гёжефле эм аланы тренерлери Арсен Закуев бла республиканы Спорт министерствосунда тюбешиу болгъанды.

Спортчуланы хорламлары бла ведомствону башчысы Ислам Хасанов алгъышлагъанды. Министр, къырал даражалы эришиуде майдалланы магъаналарын черте, Россейни эркин тутушуудан чемпионатында, эм кючлю гёжефле бла тутуша, республикадан финалгъа бир кереге юч спортчу чыкъгъанын уллу жетишимге санагъанды. «Былайда аланы юйретген Россейни сыйлы тренери Арсен Закуевни  да белгилерге тийишлиди, спортчулары аллай кёрюмдюле болдурурларына аны къыйыны, айхайда, уллуду», - дегенди ол.

  Арсен Закуев да чемпионатха къатышыргъа себеплик этгенлеге – министерствогъа жарау этиуню бийик даражада къураргъа онг тапдыргъаны, медиклеге, техника специалистлеге – ыразылыгъын билдиргенди.

 Тюбешиуню ахырында жыйылгъанла россейли гёжефлени халкъла аралы эришиулеге жибериуню амалларын сюзгендиле.