Уллу жетишимлеге итине

Ангелина Лазаренко – республикабызны эм умутландыргъан жаш спортчуларындан бириди. Тренери Этезланы Владимирни башчылыгъында ол единоборстволаны талай тюрлюсюнде жетишимли болгъанды, спортну устасына кандидатны нормативин толтургъанды эм бютюн уллу хорламлагъа итинеди.

Ангелина Тырныауузда туугъанды, 1-чи номерли лицейде окъугъанды. Мектепде эм сюйген предметлеринден бири уа физкультура эди, аны ючюн спорт жашауунда уллу жерни алгъаны сейир тюйюлдю. Сегиз жылында Элбрус районну олимпиада резервли спорт школуну каратеден бёлюмюне жюрюп башлагъанды.

 - Спорт залгъа атам бла анам келтиргендиле, - дейди Ангелина. – Биринчи жараууму бек жаратып, секциягъа келирге кесим да сюйгенме. Талай жылны анда Руслан Нахушев, Евгений Могилевец бла Владимир Юнусов юйретгендиле, аланы болушлукълары бла каратени – спортну сейир, акъылынгы-санынгы да толусунлай бийлеген спортну энчиликлерине тюшюннгенме. Биринчи эришиулеримде, ала уа Тырныауузда ётген эдиле, саугъа жерге чыкъгъанма. Ол мени бютюн кёллендирип, профессионал даражагъа жетерча кюрешип башлагъанма. Андан сора кёп турнирге къатышханма, алада ахшы кёрюмдюле да болдургъанма.

Эки жыл мындан алгъа уа Ангелина туугъан шахарында «Барс-Тырныауз» спорт клуб ачылгъанын, анда каратени всестилевой тюрлюсюне юйретгенлерин билгенди. Кесин анда сынаргъа излеп, бир ыйыкъ клубха жюрюгенинден сора, къыз анда къалыргъа оноу этгенди.

- Всестилевой каратеде приёмла асламыракъдыла, ол аскер искусствону контактлы тюрлюсюдю, аны бек жаратханма, - деп белгилейди жаш спортчу. – Мында тюрлю-тюрлю единоборствола бардыла: Зендокай Будо каратэ, Араши каратэ, каратэ WKS, WSKF эм башхала, эришиуледе талай дисциплинада сермеширге жарайды. Жарауубуз ыйыкъгъа беш кере болады, сынамыбызны ёсдюрюр ючюн, тренерлерибиз Нальчикге башха клублагъа да элтедиле.

Арт кезиуде Ангелина, «Барс-Тырныаузну» башха келечилери да аслам эришиуде сермешедиле эм асламысында майдалла да къытадыла. Ангелина республиканы, Ингушетияны, Шимал Осетия-Аланияны, Ставрополь крайны биринчиликлеринде кёп кере хорлагъанды. Федерал даражада да жетишимлери бла къууандыргъанды. Сёз ючюн, алгъаракълада Орёлда аскер искусстволаны битеуроссей фестивалында алтын майдалны къытханды.  Аны юсюнден ол былай эсгереди: «Финал ючюн тюбешиулеримде эм ахыр сермешимде сынамлы, Россейни бла дунияны чемпионкалары бла тюйюшюрге тюшгенди. Тренерим айтханны толтургъанымы хайырындан аланы барысында да хорлаялгъанма».

Эм къыйын а быйыл майда Ара федерал округну Смоленск шахарда ётдюрюлген биринчилиги болгъанды. Анда ол кесин судьяны къуллугъунда да сынагъанды – сабийлени эришгенлерине къарагъанды. Артда айтханыча, кесини сермешлерини заманы жетгенде асыры арыгъандан, къарыуу къалмагъан эди. Сора, жангызда 16 жылы болгъанлыкъгъа, анга 18-20-жыллыкъ спортчула бла тюйюшюрге тюшгенди. Анга да къарамай, Ангелина айырыу сермешлени жетишимли бошагъанды, финалда уа анга къарчшы Смоленскден Анастасия Колганова – спортну устасы, Россейни биринчиликлерини кёп кере призёру - тургъанды. Лазаренко быллай сынамлы спортчуну къытарына, баям, жангызда тренерлери ийнаннгандыла. Ол да аланы ышаныуларын алдатмагъанды – 6:2 эсеп бла хорлагъанды.

Бюгюнлюкде Ангелина Элбрус регион колледжде «Башланнган классланы устазы» жаны бла окъуй турады. Билим алыуну бла жарауланы бирге бардыргъан тынч тюйюлдю, алай къыз кеси айтханыча, ала бир бирлерине чырмау этмейдиле. Коллеждни башчылары да окъуучуларыны бу болумуна ангылап къарайдыла, ол программадан артха къалмазча, энчи заданияла бередиле. Ангелина да аланы, онгуна кёре, бирде автобусда, бирде поездде эришиулеге бара толтурады.

Тренери Этезланы Владимирни юсюнде айта, спортчу ол огъурлу, спортда, харкюнлюк жашауда да болушургъа хазыр инсан болгъанын  белгилейди. «Аны башчылыгъында не тюрлю эришиуледе да сермеширге тынчды. Ол тюбешиу баргъанына тюрслеп къарайды, керек заманда тюзетеди, заманында этген насийхаты бла хорларгъа болушады», - дейди. Владимир да Ангелинаны  иш кёллюлюгюн, итиниулюгюн, салыннган борчну тамамлауда къатылыгъын чертеди. Тренер билдиргенича, бу шартла каратечиге эришиуледе алчы жерлеге чыгъаргъа болушадыла, майдалланы уа ол иги кесек жыйгъанды.

Бусагъатда Ангелина дунияны чемпионатына хазырлана турады, ол а августну экинчи жарымында Чебоксарыде боллукъду. Анда талай категорияда хорларына ышанады. Мураты уа дунияны абсолютный чемпионкасы болургъа, спортну халкъла аралы устасы деген атны алыргъады. Кесин тренер халда да сынайды, «Барс-Тырныауз» клубда гитче жыл санда сабийлени юйретеди. Единоборстволада карьерасы бошалгъандан сора да жашауун тренерлик бла байламлы этер умут бла бийик билим алыргъа Спорт факультетге кирирге дейди.

Суратда: Ангелина Лазаренко тренерлери бла.