Окъугъанлары, адеплиликлери бла да айырмалыла

Жыл сайын республикада  школланы бошап, жашауну кенг жолуна атлагъанла мингле бла саналадыла. КъМР-ни Билим бериу эм илму министерствосу билдиргеннге кёре, быйыл да 11 классны бошагъанла 4 мингден асламдыла. Аланы араларында  миллетибизден биринчи классдан башлап 11-ге дери бир тёрт алмай окъугъан къызла бла жашла да кёп болгъанлары къууандырады. Аланы  бир ненчасы бла танышдырыргъа сюебиз. 

Тейрикъулланы Марат Нальчикни 14-чю номерли гимназиясында окъугъанды. Башланнган классладан окъуна  окъуу юйню жашаууна тири къатышханды. Аны иги окъугъанына алтын майдалы да шагъатлыкъ этеди. Дагъыда ол былтыр Москвада бардырылгъан «Моя законотворческая инициатива» деген битеуроссей конкурсда  биринчи жерге чыкъгъанды, 2020-2022 жыллада орус тилден КъМКъУ бардыргъан шимал-кавказ олимпиадаланы призёруду, «Гимназияны бек иги окъуучусу» деген атны жюрютгенди эм гимназияны окъуучула советини президенти болуп тургъанды.

Марат назму айтыргъа, тюрлю-тюрлю чыгъармаладан юзюклени окъургъа да бек сюеди. Ол жаны бла республика даражалы  эришиулеге къатышып, алчы жерлеге тийишли бола тургъанды. Бир кезиуде школдан сора театр искусствону сайлар акъылы да бар эди. Ким биледи, талай  замандан ол жаны бла усталыкъ алыргъа да таукелленирге болур. Хунери барды. Алыкъа уа Санкт-Петербургну къырал университетине кирир муратлыды.  

Хулчаланы Элеонора Нальчикни 6-чы номерли школун бошагъанды. Биринчи классдан башлап ол къуру бешлеге окъугъанды. Атасы аскерчи болгъаны себепли, Хулчаланы юйюр Волгоградда жашап тургъанды. Бери ала 2019 жылда кёчгендиле. Алай къайда да къыз окъуууна энчи эс бёлгенди. Абадан класслагъа ётгенинден бери  медицина жаны бла окъургъа барлыгъын толу биле эди. Аны себепли школдан тышында да, ол окъууда керек боллукъ предметлени теренирек билирге итиннгенди. Ол къыйыны да бошуна кетмегенди.

Элеонора Санкт-Петербургну медицина институтларындан бирин сайлагъанды. Миллетибизде бу ызны ата-аналарыны оноулары бла угъай, кеслери сюйюп тутханла кёп болгъанлары къууандырады. Нек дегенде, бу усталыкъгъа адам жюреги  тартып барыргъа керекди. Элеонора ма аллайладан бириди.

Быйыл Элбрус районну школларын 157 къыз бла жаш бошагъандыла. Аланы араларында майдалла алгъанла  бир заманда да болмагъанча кёп эдиле. Жаш адамларыбызны билимлиле болургъа итиниулюклери жылдан-жылгъа ёсе баргъаны бек къууандырады. Кертиси бла да,  айырмалы аттестатла алгъанланы юслеринден толу хапар соргъанымда, аланы хар бирини юсюнден да махтау сёзле айтыла эдиле. Хар райондан да 4-5 окъуучуну юслеринден  газетде басмаларыбызны тийишли кёрюп жибергендиле бизге. Алай барысын да басмалар онгубуз болмагъаны себепли, биз бирин сайлагъанбыз. Ол Тырныауузну 6-чы номерли школун бошагъан Жаппуланы Салимады. 

Ол тюрлю-тюрлю конкурслагъа тири къатышып, алада  кёп кере хорлагъанды. Сёз ючюн, «Чекчилени жаш шуёхлары» деген эришиуню регион кезиуюнде Калашниковну автоматын чачып жыйыуда анга жетген болмагъанды. Дагъыда школну «Жетишим» деген аскер-патриот къауумуну капитаны болуп тургъанды. Андан тышында да, районну политика жашаууна, волонтёр къымылдауну ишине тири къатышханлай келгенди. Экзаменлерин  жетишимли берип, айырмалы аттестат да алгъанды. Салима врач болур муратлыды. Медицинаны сайлагъаны уа адамлагъа хайыр келтирирге итиниулюгю бла байламлыды.

Черек районну школларындан  быйыл 159 жаш адам орта билим алып чыкъгъандыла. Къашхатаучу къызлагъа бла жашлагъа  аттестатларын районну ара маданият юйюнде бергендиле. Ол къууанчлы ишге район администрацияны таматасы Къулбайланы Алан да къатышхан эди. Сиз кёрген суратда ол Чеченланы Джамиляны майдал бла саугъалайды.

Джамиля айырмалы окъуучуладан бириди. Къачан да школну жашаууна тири къатышханлай келгенди. Аны класс таматасы Хоханаланы Зульфия айтханнга кёре, ол да медицинаны сайлагъанды. Школдача тынгылы окъуса, чынтты врач боллугъуна ишеклик жокъду.

Кертиси бла да, быллай хунерли жаш тёлю ёсгени къууандырады. Аланы ызларындан келгенле да аладан ашхы кёрюмдюле болдурурла деп ийнанабыз. Бюгюнлюкде уа хар бири да, къайсы ызны сайлагъан эселе да, студентле болуп, муратларына жетсинле.  Биз а аланы вузлада жетишимлерини юслеринден хапар билдирирге не заманда да хазырбыз.