Токну хайырланыучуланы сурамларын жалчыта

«Россети Шимал Кавказ» компания электрокюч сетьлени келир кюз эмда къыш кезиуледе чурумсуз ишлетирге хазырлайды. Аны КъМР-де бёлюмюню - «Каббалкэнергону» специалистлери, тийишли программаны чеклеринде, Прохладна районда «Саратовская» подстанциягъа тынгылы ремонт этгендиле.

Бу объект 1967 жылдан бери ишлейди. Ол хайырланыучулагъа 35 кВ электрокюч жибереди. Специалистле аны токну ёчюлтюучю эмда къоруулаучу оборудованиясын шёндюгю тюрлюлерине алышхандыла. Этилген ишни хайырындан районда, ол санда Черниговская, Янтарная, Саратовский, Советский, Псыншоко, Благовещенка (аны бир кесегинде) эм Алтуд элледе 7,5 минг хайырланыучуну эмда 35 социал объектни электрокюч бла бютюнда ышаннгылы жалчытыргъа боллукъду.

Сют жарашдыргъан мюлкге – 140 киловатт электрокюч

«Каббалкэнергону» специалистлери Герпегежде ачылгъан сют жарашдырыучу производствону электрокюч сетьге къошхандыла.

Ол цех жарашдырыучу эл мюлк кооперативге киреди. Сют продукциягъа сурам ёсюп башлагъанын эсге алып, анда бишлакъ эм башха ашарыкъла чыгъарыуну энчи производствогъа бёлюрге оноу этгендиле. Энергетикле уа «Аушигер» подстанциядан ары 140 кВ электрокюч барырча этгендиле.