Уруш жолланы суратлары – патриот ниетледе юйретиуню бир кесеги

2022 жылда 21 июньда «Радуга» социал-реабилитация арада Суратлау искусстволаны А.Л. Ткаченко атлы музейини келечилери Уллу Ата журт урушха аталгъан графикалы ишлени «Урушну жоллары бла» деген кёрмючюн къурагъандыла. Ала музейни тышына чыгъарылып кёргюзтюрча онг болгъан фондундан суратладыла, кеслерин да Аскер художниклени М.Б. Греков атлы студиясы эм Къабарты-Малкъардан фронтчула хазырлагъандыла. Аны юсюнден бизге КъМР-ни Маданият министерствосуну пресс-службасындан хапарлагъандыла. 
Музейни методисти Жантуудуланы Елизавета сабийлеге ишлени авторларыны юсюнден билдиргенди, аланы тематика башхалыкъларына, техникалы энчиликлерине эслерин бурдуртханды, республиканы ёсюп келген тёлюсюн патриот эм тин жаны бла юйретиуде магъаналылыкъларын белгилегенди. 
Кёрмюч бла байламлы экскурсияда сабийле урушну биринчи кюнлеринден башлап «грековцы» къауум аскер корреспондентлени борчларын толтургъанларын билгендиле. Ол а алай фронда журналистле бла фотокорреспондентле жетишмегенлери ючюн болгъан эди. Фронтдагъы суратланы сюжетлерини юсюнден айта, экскурсияны бардыргъан аскер художниклени баш борчлары уллу азатлау урушну тарых суратлау летописин къурау болгъанын чертгенди, Ата журтубузну жалынчакъсызлыгъы ючюн деменгили сермешлени, батыр адамланы сыфатларын кёргюзтюу да.
П.Г. Пономаренкону «1942 жылдан репортаж» деген ат бла бирикдирилген уллу халлы графика иши сюжетлени кёплюгю эм толтурулгъаныны техникалы энчилиги бла сейирсиндиреди. Республиканы халкъыны къатышыуу бла 1941 жылда ноябрьде къуралгъан 115-чи атлы дивизиягъа жоралауунда Г.С. Паштов шарт кесгин сурат бла Шимал Кавказны азатлау къыйын сермешледе бу аскер бёлюмню асламысы къырылгъанына жамауатны болмагъанча жарсыгъанын эм аны терен жюрек жарасын уста кёргюзталгъанды.