Республиканы жаш тёлюню ишлери жаны бла министрине Азамат Люев салыннганды

КъМР-ни Башчысы Казбек Коков  Азамат Люевни Къабарты-Малкъар Республиканы жаш тёлюню ишлери жаны бла министрине салыуну юсюнден указгъа къол салгъанды. Документ КъМР-ни Башчысыны официал сайтында басмаланады.

Эсигизге салайыкъ, къырал властьны жангы регион толтуруучу органы Къабарты-Малкъар Республиканы Жаш тёлюню ишлери жаны бла министерствосу – КъМР-ни Башчысыны быйыл 18 майда чыгъарылгъан указына кёре къуралгъанды.

Жангы министрни жаш тёлю бла ишлеу,  жаш тёлю бла байламлы магъаналы социал проектлени, ол санда федерал проектлени да, къурау, жашауда бардырыу жаны бла да уллу сынауу барды. Ол РФ-ни Президентини ыспас письмолары бла да эки кере белгиленнгенди.

Шёндюге дери Азамат Люев Шимал-Кавказ федерал университетни жаш тёлю политика жаны бла проректору болуп тургъанды. 2007-2009 жыллада Къабарты-Малкъар къырал университетни студент советине башчылыкъ этгенди. Мында дагъыда жаш тёлю политика эмда юйретиу иш жаны бла управленияны таматасыны къуллугъунда ишлегенди. Аны бла бирге илму  бла да кюрешгенди – социал ишни теориясыны бла технологияларыны кафедрасыны доцентиди, социология илмуланы кандидатыды. Университетде дагъыда стратегиялы айныуну управлениясына башчылыкъ этгенди.

2018 жылда КъМР-ни Жарыкъландырыу, илму эмда жаш тёлюню ишлери жаны бла министерствосуну Бёлюнмей айныуну арасыны директоруну орунбасарыны къуллугъуна салыннганды. 2020 Шимал-Кавказ федерал университетге проректорну юйретиу жаны бла орунбасарыны къуллугъуна чакъырылгъанды. Ол жыл окъуна бу окъуу юйню проректоруна салыннганды.

2017-2020 жыллада Азамат Люев Нальчик шахар округну Жер-жерли самоуправление советини депутаты болуп тургъанды. 2019 жылдан башлап 2021 жылгъа дери    Россей Федерацияны Федерал Советинде Жаш законодательлени палатасына киргенди.

 

Юсюпланы Галина хазырлагъанды.
Поделиться: