Минги таугъа сынамлы ёрлеучюле чыгъарыкъдыла

Алгъаракълада билдиргенибизча, Къабарты-Малкъарны къыраллыгъын белгилеуню чегинде августда «Эльбрусиада – 2022» боллукъду. Анга кёре Россейни жер-жерлеринден келип, Минги таугъа бир жолгъа 100 инсан чыгъарыкъдыла.

Республиканы Правительствосу телеграм-каналында билдиргеннге кёре, «Эльбрусиадагъа» къатышыргъа заявка асыры кёп адамдан келгени себепли, бюгюнлюкде аланы саны 200-ден атлагъанды, Россейни Альпинизмден федерациясы (ФАР) бу ишге жангызда таулагъа ёрлеуден сынаулары эм ФАР-да членствосу болгъан адамла къатышырча чек салгъанды.

Эсгертиу: альпинистле, эки къауумгъа юлешинип, тауну эки башына Азау таладан классика маршрутла бла барлыкъдыла. Чыгъыу башланырдан алгъа аланы къаялагъа ёрлеуде хазырлылыкъларына къаралырыкъды, спорт бла кюреширге эркинлик берген медицина справкаланы сурарыкъдыла, альпинизм бла кюрешгенде жашауну эм саулукъну къыйын болумладан страхование этериклери да изленирикди.