Миллет проектле къалай толтурулгъанларына къарагъандыла

КъМР-ни Башчысы Казбек Коков Регионланы айнытыу жаны бла правительстволу комиссияны штабыны жыйылыууна къатышханды. Аны РФ-ни Правительствосуну Председателини орунбасары Марат Хуснуллин бардыргъанды.

Жыйылыуда миллет эм федерал  проектле жашауда къалай толтурулгъанларына къаралгъанды, ол санда касса бла ётдюрюлген ырысхыла эм эсепге алыннган кёрюмдюле сюзюлгендиле.

 Штабны жыйылыууна РФ-ни къурулуш эмда жашау журтла-коммунал мюлк   министри Ирек Файзуллин, Федерал жол агентствону башчысы Роман Новиков, РФ-ни МВД-сыны жоллада къуркъуусузлукъну жалчытыу жаны бла баш управлениясыны таматасы Михаил Черников эм регионланы башчылары къатышхандыла.

Къабарты-Малкъар Республика жашау журтланы, жоллада къурулуш ишлени бардырыуу бла ёсюмюн сакълайды эм кёрюмдюлери бла къыралны регионларыны ичинде алчыланы санындады. Аны юсюнден КъМР-ни Башчысы Казбек Коков жыйылыуну итогларыны кёре кесини телеграм каналында айтханды.

«Кёрюмдюлерибизни эм ахшысы инфраструктураны игилендириуде «Стимул» къурулуш программаны толтуруудады, ол жаны бла эллерибизде транспорт жюрюучю орамланы тапландырыу эм  жоллада къурулуш ишлени бардырыу бла Россейни он алчы регионуну санына киребиз. Быйылгъы жылгъа жоллагъа ремонт этиу бла борчларыбызны 100 процентге толтургъанбыз. Быйыл «Къоркъуусузлу эмда тынгылы автомашина жолла» миллет проектни чеклеринде 70 объектде ишле бардырыллыкъдыла. Аладан 43 жерде ишле толусунлай бошалгъандыла. Арт юч жылны ичинде комплексли ишлени бардыргъаныбызны баш кёрюмдюсю - жолларыбызда къоркъуусузлукъну жалчытыуду. Федерал эм регион жоллада, ол санда адамла ёлген аварияланы саны аздан-аз бола барадыла. Сёз ючюн, юсюбюздеги жылны биринчи кварталында озгъан жылны бу кезиую бла тенглешдиргенде, аварияланы саны 31 процентге азайгъанды, ёлген адамланы саны да 18 процентге азды», - деп айтылады билдириуде.

Эсигизге салайыкъ, быйылгъы жылда «Къоркъуусузлу эмда тынгылы автомашина жолла» миллет проектни жашауда бардырыргъа 1,5 миллиард сом бёлюнеди. Саулайда 2022 жылда 100 километр автомобиль жол тап халгъа келтирилликди, 40 километ жолну эки жанында чыракъла жанарча боллукъдула. Дагъыда жоллада адамла ётген 16 жер  жангы миллет излемлеге кёре тапландырыллыкъды.     

«Кюн сайын объектледе ишле къалай бардырылгъанларына эм белгиленнген болжалгъа тамамланырыкъмыдыла  деп тохтамагъанлай къарагъанлай турабыз», - дегенди КъМР-ни Башчысы Казбек Коков кесини билдириуюнде.