Республикада орамла бютюн айбат боллукъдула

Тапландырыла тургъан объектлеге къарау бла байламлы ишчи жолоучулугъуну юсюнден КъМР-ни Башчысы Казбек Коков кесини телеграм-каналында хапарлагъанды:

«Къабарты-Малкъар Республиканы 100-жыллыгъына хазырланыу андан ары бардырылады.  Нальчикде Ленин, Къулий улу, Шогенцуков атлы орамланы эм Къабарты орамны тапландырыу ишлерине къарагъанма.

Ленин атлы проспектде къурулушчула жангы тротуар плитка саладыла, «Таза кёк» программа жаны бла жумушла тындырыладыла. Жууукъ заманда орамны машинала жюрюген кесегине тюзетиу къаты жайылырча ишле тамамланырыкъдыла. 

Къулий улу атлы проспектде инженер коммуникацияланы жангыртыу ахырына жетеди, орамда жарыкълыкъ берген конструкцияла сюелтилинедиле. Машинала жюрюген кесекде тюзетиу къаты жайылгъанды, тротуар плитка салынады.

Шогенцуков атлы проспект да айбатланады. Мында машинала жюрюген кесекде асфальт жайылгъанды, Толстого орамдан Захаровагъа дери да тапландырыу ишле башланнгандыла. Жаяу жюрюген тийреледе плитка салынады.  Инженер коммуникацияланы жангыртхандыла эмда «Таза кёк» программа жаны бла ишле ахырына жетедиле.

Къабарты орамда Идаровадан башлап шахардан чыкъгъан тийреге дери 4,6 километр узунлукъда тюзетиу къаты жайылгъанды, 3,5 километр участкада биринчи къаты салыннганды. Дагъыда ишчиле жол участканы кенгертирге хазырлайдыла. Аны бла бирге орамда тыйыу чеклениулени, тротуарланы, терекле салына тургъан жашил тийрелени тапландырыу бардырылады. Мында орамда жарыкълыкъ бериу жангы багъанала салынадыла, ток ызланы монтажы тамамланады», - деп жазгъанды республиканы Башчысы кесини публикациясында. 

«Ишлени качестволарына эм аланы толтурулууларына кюн сайын къаралады. Шахарда битеу ишле августну ахырына дери тамамланырыкъдыла», - деп чертгенди Казбек Коков.