Сугъарылгъан жерлени санын кёбейтирге алланып

Кёп болмай Сбербанкны Къабарты-Малкъарда бёлюмю  мелиорация системаны  айнытыргъа эл мюлкде къармашханлагъа  сегиз жылгъа 152 миллион сом ёнкюч бергенди. Саулай проектни багъасы  239 миллион  сомгъа жетеди. Аны «ПИК Европы» эл мюлк предприятие Чегем, Май эм Прохладна районлада 1454 гектарда бардырлыкъды.

- Арт жыллада республикада эл мюлк бёлюм тири айный барады. Аны баш шартларындан бири агропромышленный комплексде уруннган компаниялагъа  танг кесек болушлукъ этилгениндеди. Ол санда  бу жаны бла Сбербанкны къыйматлы   программалары ишлейдиле. Сёз ючюн, жаланда былтыр эл мюлк предприятиялагъа 800 миллиондан аслам  сом  бёлюннгенди.   Аны асламысын терек бахчачылыкъда уруннганла алгъандыла,-  дейди Сбербанкны бёлюмюню таматасы Залина Бейтуганова.

Проектни магъанасы гидротехнологиялы   мелиорация система къураргъады. Аны хайыры бла  сугъарылгъан жерледен  жылгъа будайдан – 3 эм нартюхден 5 минг тоннагъа артыкъ  тирлик алыргъа онг табыллыкъды.

- Сбербанкны болушлугъу бла сугъаралыгъан сабанлыкълада тирликни иги кесекге кёбейтирге онг табыллыкъды. Бюгюнлюкде жауун халда сугъаргъан машиналаны  жерлерине тапдырып эм жыйып башлагъандыла.  Жууукъ заманда аланы ишлетирча мадар этилликди,-  дейди «ПИК Европы» эл мюлк предприятияны таматасы Артур Аброков.