Ипотеканы, башха кредитлени да алыу ёсгенди

Къабарты-Малкъарда энчи предпринимательлеге, предприятиялагъа эмда организациялагъа быйыл биринчи кварталда берилген кредитлени ёлчеми 3,5 миллиард сомдан атлагъанды. Озгъан жылны бу кезиую бла тенглешдиргенде, ол 1,7 кереге кёбейгенди, деп билдиргендиле РФ-ни Ара Банкыны республикада бёлюмюню пресс-службасындан.

«Бизнесге берилген онгла аланы кредит алыргъа кёллендиргендиле. Бу жаны бла тирилик жарашдырыучу производстволада, ол санда аш-азыкъ чыгъарыуда да иги эсленеди», - дегенди финанс учрежденияны башчысыны орунбасары Аслан Калов.

Сагъынылгъан ахчаны асламысын (юч миллиард сом) гитче эмда орта бизнес бла кюрешгенле алгъандыла. Алай бла быйыл биринчи апрельге аланы барыны да кредит портфели 14 миллиард сомдан артыкъ болгъанды. Былтырны тийишли кёрюмдюсю бла тенглешдиргенде, ёсюм онбир процентден атлагъанды.

Битеу берилген розница кредитлени ёлчеми уа, бешден бирине кёбейип, 68 миллиард сомгъа жете къалады. Ол санда ипотека программаланы чеклеринде 27,6 процентге асламыракъ ахча берилгенди. Абериле сатып алыргъа деп жарашдырылгъан кредитлени портфели уа 17,5 процентге кёбейип, 39 миллиард сомгъа жетгенди. Аслан Калов айтханнга кёре, жеринден тепдирилмеген мюлкню адамла инвестиция умутла бла алгъанлары себепли ёсгенди ипотека кредитлени бериу да.