Жалгъан продукциягъа жол бермез хыйсап бла

Юслеринде цифралы белгилери борчлу халда болургъа керек товарланы тизмесине РФ-ни Правительствосуну оноуу бла сыра эмда артыкъ кючлю болмагъан чагъыр продукция къошулгъандыла. Россейни Промышленность министерствосуну интернет-сайтында айтылгъаннга кёре «быллай белги салыу тюкенледе сыраны азлыгъына келтирлик тюйюлдю». Бу жорукъ къачан кийириллигини юсюнден быллай продукция чыгъарыучула бла оноулаша турадыла.

КъМР-ни Промышленность, энергетика эм сатыу-алыу министерствосундан билдиргенлерича, сырагъа белги салыу иш сынам халда былтыр 1-чи апрельде башланнганды, кеси да быйыл августну ахырына дери барлыкъды. Бу проектге 103 компания эмда онжети импортёр къатышады. Ала информацияны ЕГАИС-ге эмда товарланы сатыу-алыугъа мониторинг этген къырал системагъа жиберип турургъа керекдиле.

Эсге сала айтсакъ, бюгюнлюкде цифралы белги дарманлагъа, сют продукциягъа, тютюннге, дух суулагъа, тюклю тонлагъа, аякъ кийимлеге эмда талай башха тюрлю товарлагъа бла продукциялагъа салынады. Эки жылдан сора Россейде бу жаны бла бирикген къырал система ишлеп тебирерикди. Аны хайырындан жалгъан товарланы эмда продукцияны сатыу-алыу къурурукъду.