Къарыусуз юйюрлени къайгъысын кёре

ОНФ-ни Къабарты-Малкъарда бёлюмюню келечилери, кёп сабийли эмда къолайсыз он юйюрге аш-азыкъ хуржунла бла юйде керекли химия затла бергендиле. Бу ишни ала #МыВместе деген  акцияны чеклеринде тамамлагъандыла.

 

Болушлукъ алыргъа тийишли болгъанланы тизмесин жамауатны келечилери «ОНФ» деген мобил къошакъда билдириуге  кёре жарашдыргъандыла. Ары заявкаланы уа гражданла кеслери бере туруучудула. Алай бла хар юйюрге да экишер хуржун  юлешиннгенди. 

Сабийлеге да бош къоллары бла бармай, татлы ашарыкъла эмда топла бла оюнла бергендиле. 

– Къолайсыз, саулукъларында чекленнген онглары болгъан эмда кёп сабийли юйюрлеге биз тёрели халда болушабыз: аш-азыкъ, башха затла да элтебиз, гитчелени саугъачыкъла бла къууандырабыз. Ата-анала бла ушакъ этип, экинчи кере не зат келтирсек  иги боллугъун да билебиз. Бирлеге уа башха тюрлю болушлукъ керек болуучуду да, аны да толтурургъа кюрешебиз. Сёз ючюн, аналадан бири, алгъаракъда бизге сёлешип, сабийине  психолог табарыбызны  тилеген эди. Биз аны тийишли специалистге жибергенбиз, - дегенди ОНФ-ни келечиси Ислам Макоев.

 

 

Улбашланы Мурат хазырлагъанды.
Поделиться: