Терек бахчачылыкъ

Къабарты-Малкъарны эл мюлклеринде жаз башы ишле бошалыргъа кёп къалмагъандыла. Ол санда бу кюнледе  алма тереклени  орнатып бошагъандыла. Саулай алып айтханда,  быйыл жемиш терекчикледен 1500 гектардан асламда салыр мурат барды.  

Районладан  билдиргенлерине  кёре, терк айныгъан терек бахчала 600 гектарны  тутадыла. Ол санда 25 гектардан артыгъы питомниклеге  эм 20 гектары да  кёкшуугъа жетеди.  Сентябрьде  наныкъ терекчикле да  орнатыллыкъдыла.

Эсге сала айтсакъ: Къабарты-Малкъар арт жыллада  терек бахчачылыкъ  жаны бла алчылыкъны ычхындырмай келеди.

Былтырдан аслам

Шимал Кавказстатны эсеплерине кёре, Къабарты-Малкъарны эл мюлклеринде быйылны  башындан бери  8,2 миллиард сом багъасы продукция чыгъарылгъанды. Ол былтыр бла тенглешдиргенде 102 процентни тутады.

Сагъынылгъан кезиуде тууар этден (союлмагъан ауурлукъда) 28,8, сютден 138 минг тонна эм жумуртхаладан 56,8 миллион чакълысы сатылгъанды. Алай бла  малчылыкъ бла байламлы  производствону ёсдюрюрге да  онг табылгъанды.   Былтыр бла тенглешдиргенде  тууар эм юй  къанатлы этден – 2,4, сютден -1,7 эм жумуртхаладан 3 процентге аслам алыннганды.   

Хайыры уллуду

 Къабарты-Малкъарда  жилекле 145 мингден артыкъ  гектарда  ёседиле. Орта эсеп бла алгъанда,  бир гектардан 5-8 тонна чыгъады.

Аграрчыла жангы технологияланы  эм тюрлю-тюрлю  сортланы хайырланнганлары ючюн  тирлик жыйыу майдан башлап июльню ахырына дери барады.    

Бюгюнлюкде  республиканы мюлклеринде 165 тоннадан аслам  сатылгъанды.  Аны  бла  республика  кесин толу жалчытханлы бир ненча жыл болады. Бюгюнлюкде  аны иги кесегин тыш  регионлагъа да ашырадыла.

Эл мюлк предприятияладан, энчи предпринимательледен сора да, жилекни   кеслерини бахчаларында   ёсдюрюп кюрешгенле   да кёпдюле. 

Эсге сала айтсакъ, мюлклени барысында да жилекледен 4,7 минг тонна жыйылгъанды. Болсада быйыл  аграрчыла былтырдан эсе бай тирлик алыр муратлыдыла.