Аманлыкъчыла тутулгъандыла

Аскерде къуллукъ этиуден албугъатханды

Нальчикни прокуроруну болушлукъчусу Тимур Абазов шахарчыгъа ачылгъан уголовный ишни къабыл кёргенди. Ол бир тюрлю законлу сылтауу болмай, аскерде къуллукъ этиуден букъгъанына ишеклик барды (РФ-ни УК-сыны 328-чи статьясыны 1-чи кесеги).

Тохташдырылгъаныча, былтыр декабрьде жаш адамгъа военкоматха келирге кереклисини юсюнден билдириу берилгенди. Алай ол белгиленнген заманда ары келмегенди, алай бла уа аскерде къуллукъ этиуден букъгъанды.

Сюд къырал терслеучюню оюмун тюзге санап, жаш адамгъа тазир салыргъа деген оноуну чыгъаргъанды

Болжалланы бузгъандыла

Тарифле эм жашау журт надзор жаны бла къырал комитетни   къуллукъчулары административ жууапха тартылгъандыла. 

Надзор ведомство  организацияланы бла энчи предприятияланы ишлерине контрольну тамамлагъанда  законла къалай сакъланнганларын сюзгенди. Аны кезиуюнде предпринимательлени ишлерине къаралгъандан сора ачыкъланнган шартла «Тинтиулени бирикдирилген тизмесине» заманында кийирилмегенлери белгили болгъанды.

Аны бла байламлы къырал комитетни эки келечисине РФ-ни КоАП-ыны 19.6.1-чи статьясыны 3-чю кесегине кёре  административ ишле ачылгъандыла.

  Кючлю затланы ташыуну къурагъанды

 Урван районну прокуроруну болушлукъчусу Жанета Темрока РФ-ни къырал чегинден, законлагъа бузукълукъла этип, уулу затланы ташыуну къурагъан тиширыуну терслеу материалланы къабыл кёргенди. Ол РФ-ни УК-сыны 226.1-чи статьясыны 1-чи кесегине бузукълукъ этгенине ишеклик барды. 

 Тохташдырылгъаныча, республиканы инсаны Къытайдан Россейге почтаны болушлугъу бла кючлю препаратланы келтирип тургъанды.  Сюдню оноуу бла терсленнген тиширыу бир жылны къаты низамлы колонияда тутрлукъду.

Кендирни жыйып, уу хазырлагъанды

Черек районну прокуроруну болушлукъчусу Тогъузаланы Фатима районну инсанына ачылгъан уголовный ишни къабыл кёргенди. Ол кёп санда наркотиклени сатып алгъаны, асырагъаны ючюн терсленнгенди.

Быйыл январьда эр киши кеси аллына ёсген кендирни чапыракъларын жыйып, аладан наркотик этгенди. Ол аны кеси ичерге хазырланнганды.

Сюд эр кишини эркинлигин 3 жылгъа сыйырыргъа деген оноуну чыгъаргъанды. Ол условно халда толтуруллукъду.