Адет -тёрени да унутмай

Бызынгыны мектебинде манга кёп кере болургъа тюшгенди. Хар  баргъаным сайын жангы затлагъа тюбейме. Аны  айтханым, андагъы устазла   алгъа итиннген,  алчы  сынауну, жангы амалланы кенг хайырланнган адамладыла. Аланы  ёсюп келген тёлюню тау адетледе, патриот ниетде   юйретиуге аслам эс бёлгенлерин а бютюн бек жаратама.

Андан сора да, мында культурагъа, искусствогъа да эс бёлюр ючюн да къалмайдыла. Бу элде ёсюп келген тёлюню   арасында   жыргъа, тепсеуге, сахна оюннга, къолдан усталыкълагъа фахмуланы да ачыкълай биледиле.  

Абадан классланы окъуучулары кёп жаны бла башхаладан айырмалыдыла деп да, таукел айтыргъа боллукъду.  Сёзсюз, узакъ тау элледе жашагъанланы, шахаргъа барып, уста жырчыларыбызгъа,  «Балкарияны» тепсеулерине да  къарар онглары алай кёп жокъду. Болсада  окъуучула алагъа деп жарыкъ концертле къурайдыла. 

-Ёсюп келген тёлюню ата-аналары, биз, устазла,  болмасакъ, ким  юйретирикди,-дейди устаз  Аналаны Зухура. - Сабийлерибиз кертиси бла да тау адетлерибизни иги биледиле,  билим алыргъа итинедиле,  тойлада, ингирледе  кеслерин тийишлисича  жюрютедиле, керек болса, бек ариу, уста  да тепсейдиле. Талай жыл мындан алгъа элде байрамлада жыйылсакъ,  вальс, аллай башха тепсеуле бла ёте эди ингир. Энди уа миллет тепсеулеге ал бурулгъанды.

Мектепде  алтмышдан аз-маз аслам сабий окъуйдула, ишлегенле, терен билим берир ючюн къайгъыргъан устазла да  жыйырма беш  боладыла. Хар устазгъа юч сабий да жетмейди,  жаш юйюрле элден кёчюп баргъанлары  себепли сабийле да кёп жокъдула, муну айта келгеним, ол аз къауумну  адеп- къылыкъгъа юйретирге уа хар устазны къолундан келлик болур, анга заман да табарыкъ , билими да жетерик болур. Сора ата-анала да юйретиу ишде бир жанында  къалып тура болмазла да? Керти да ариу къылыкъны таулу сабийлени ёсдюргенлери ючюн а  устазлагъа, ата-аналагъа уллу ыспас этерчады. Тышындан келген адамны кёзюне хар ахшы затла  терк илинип къаладыла.

 Эди уа къалай окъугъанларыны юсюнден айтмай къойсакъ жарамаз. Шёндюгю дунияда осал  къылыкълы билимсизле да керек тюйюлдюле. Кёл салып, кюн сайын да дерслерине тынгылы хазырланып,  окъууда, спортда, мектепни жамауат жашаууна  тири къатышып атларын  иги бла айтдыргъанла бу мектепде кёпдюле. Аланы араларында  7-11-чи классланы окъуучулары  Рахайланы Аминаны,  Чочайланы Аминаны, Созайланы Аминаны, Аналаны Маринаны, Текеланы Айзаны,  Ахкёбекланы Мухамматны,  Аналаны Тимурну да атларын энчи белгилеп айтыргъа боллукъду. Быйыл да, хар замандача, Бызынгы  мектепде окъугъан  Эндрейланы Ислам «Къонакъбайлыкъ» республикалы жаш тёлю проектге къатышып, Куба-Таба элде жашагъан жашны къонакъгъа алгъанды. 11-чи классны быйыл бошай тургъан Рахайланы Амина уа  ЕГЭ-лени жетишимли берсе, алтын майдал къоллу да боллукъду. Ол,  башха окъуучула да малкъар тилден бла литературадан  тюрлю-тюрлю олимпиадалада алчы жерлени алмагъан жыллары да болмагъанды. Сора  биологиядан, математикадан,тарыхдан олимпиадалада бызынгылы сабийле билимлерин сынар керекли къалмайдылда.

Окъуу жыл бошалды. Быйыл  орта школну  9-чу классын  тёрт жаш, 11-чини уа бир къыз бла юч жаш бошагъандыла. Устазлары Ботталаны Мадина Мурадиновна уа «Жылны устазы -2022» деген  район конкурсха да къатышханды.

-Пенсиягъа чыкъгъан устазларыбызны да биз,  мектепчиле, унутуп къоймайбыз. Ала бла байламлыкъ жюрютюп турабыз. Алайсыз да къалай, элибиз гитчеди, бир бирге жууукъ жетмеген жокъбуз. Бек башы уа  ала кёп эллилени окъутхандыла.  Байрам кюнледе аланы школгъа чакъырып алгъышлайбыз,-дейди  Аналаны Зухура, билим бериуде кеслерин аямагъанланы юслериндан айта.

 Бусагъатда жетишимли урунуп тургъан устазланы юслеринден да баргъанды сёз.  Ала Чочайланы Нажабат, Ахкубекланы Амина, Ботталаны Мадина, Хапаланы Анжела, Ботталаны Любадыла. Бызынгыны орта школунда, элде да  аланы атларын иги бла айтадыла.