Диспансеризация деген ол не затды?

Адам кеси эркинлиги бла тынгылы медицина къарауну ётерге сюйюп, къырал а аллай онг берсе, анга диспансеризация дейдиле. Ол кеси да хакъ тёленмей берилген жумушду.

Бу ишни кезиуюнде медицина учреждениягъа баргъан инсанны саулугъуна къарайдыла, тинтиуле этедиле, ол билмей тургъан ауруу бар эсе – аны да ачыкълайдыла. Аны ётер ючюн саулукъгъа тарыгъыу неда ышанла болуру керекмейди, жаланда адамны эркинлиги, медицина полис эмда поликлиникада эсепде болургъа тийишлиди.

Диспансеризацияда биринчи жумуш - скринингди. Аны бардыргъан кезиуде адамны саулугъу не халда болгъанын тохташдырадыла. Жашырын ауруулары ачыкъланнганланы къошакъ тинтиулеге жибередиле. Поликлиникагъа быллай жумушлары бла келгенледен анкета жазып аладыла, ызы бла адамны ёсюмюн, ауурлугъун, къан басымын тергейдиле, анализге къан аладыла, электрокардиограмма эм башха тинтиуле бардырадыла. Аланы барыны да эсеплерине кёре саулукъну паспортун бередиле.

Диспансеризацияны экинчи кезиуюнде уа инсанны энчи специалистлеге жибередиле. Андан сора аш орунда неда чегиледе ауруу болгъанын ачыкъларча ФГДС тинтиу бардырадыла. Аны кесин да врачны оноууна кёре алай. Ызы бла ёпкелеге рентген неда компьютер томограмма этерге боллукъдула, ышанлагъа кёре, башха тюрлю тинтиуле да бардырлыкъдыла.

Коронавирус бла ауруп къутулгъанланы ёпкелерине бютюнда тынгылы къарарыкъдыла, къанларында талай кёрюмдюлеге анализле этерикдиле. Диспансеризацияда не зат этилиучюсюню толу тизмеси бла http://publication.pravo.gov.ru/Document/View/0001202106300043 сайтда шагъырейленирге боллукъду.

Эсигизде болсун, бу ишни биринчи кезиуюнде врачла диагноз салмайдыла эмда багъыу этмейдиле. Аны магъанасы – саулукълары иги болгъанланы, къошакъ тинтиуле этилирге керек болгъанладан айырыуду.

Жыл санлары 18-39 болгъанлагъа диспансеризация юч жылгъа бир кере бардырылады. Андан таматала аны хар жыл сайын ётерге эркиндиле. Коронавирус бла ауруп къайтышханла уа аягъы юслерине тургъанларындан сора эм азындан 60 кюнден сора. Бу жумушха «Госуслуги» къырал порталда (https://www.gosuslugi.ru/10088/1) жазылыргъа боллукъду.

 

Омарланы Мурат хазырлагъанды.
Поделиться: