Антына кертичилей къалгъанды

Россейни Чекчи аскерлерини кюнюне аталып, Нальчикни 28-чи школунда тамата сержант Денис Сидоровични хурметине «Жигитни партасы» ачылгъанды.  

Тамата сержант Денис Сидорович 2005 жылда сауутланнган аманлыкъчыла Нальчикге чабыууллукъ этгенде, РФ-ни ФСБ-сыны КъМР-де Чекчи управлениясын къоруулай ёлгенди. Бу атышыуда кёргюзтген батырлыгъы, кишилиги ючюн, бандитлеге къажау кюрешде, жашаууна къоркъуу болгъанына да къарамай, антына кертичилей къалгъаны ючюн РФ-ни Президентини Указы бла Денис Витальевич Кишиликни ордени бла саугъаланнганды (ёлгенден сора).

Сыйлы жумушла КъМР-де Чекчи управленияны ветеран организациясыны башламчылыгъы, «Боевое братство» жамауат организацияны эмда билим бериу учрежденияны оноучуларыны себепликлери бла бардырылгъанды.

«Жигитни партасы», Денис Сидрович а бу школну 1997 жылда бошагъанды, ачылгъанына аталып, митинг къуралгъанды. Анга окъуучула, «Чекчилени жаш нёгерлерини» отряды, школчуланы ата-аналары да къатышхандыла.

Ызы бла чекчи аскерлени ветеранлары окъуучула бла Кишиликни дерсин бардыргъандыла. Сёз Денис Сидорович жашауун аямай, ахыр солуууна дери антына кертичи къалгъаныны, ол аманлыкъчыланы чекчи отряд орналгъан жерге къоймагъаныны юслеринден айтхандыла.

Тикаланы Фатима.
Поделиться: