Хунерлиле эриширикдилеТамбла Нальчикде Сакъатланы эм саулукъларында чекленнген онглары болгъанланы араларында бардырылыучу «Абилимпикс-2022» деген тёрели чемпионатны регион кезиую кесини ишин башларыкъды. Аны бла байламлы КъМР-ни жарыкъландырыу, илму эмда жаш тёлюню ишлери жаны бла министри Анзор Езаов къысха пресс-конференция бардыргъанды. Эсигизге салайыкъ, бу битеуроссей эришиуде анга къатышханла тюрлю-тюрлю усталыкълагъа хунерлерин кёргюзтедиле. Анга бизни республика 2017 жылдан бери къатышып келеди. Быйыл бла ол 6-чы кере бардырыллыкъды. Чемпионатха 14-жыллыкъладан башлап 65 жыллары толгъанлагъа дери да – ким да къатышыргъа эркинди. Анча жылны ичинде анда усталыкъларын кёргюзтюрге сюйгенлени саны 200-ден атлагъанды. Анзор Клишбиевич жерлешлерибизни быллай эришиуде кеслерини хунерлерин бла усталыкъларын кёргюзтюр онглары болгъанын ахшы ишге санагъанын билдиргенди. - Эришиуле 15 компетенцияда бардырыллыкъдыла. Аланы хар биринде да бирер хорлагъан боллукъду. Быйыл кеслерин сынаргъа сюйгенле 80 болгъандыла. Аланы араларында школчула бла студентле да бардыла. Чемпионат асламында гуманитар-техника колледжде ётерикди. Болсада дагъыда бу ишге деп 4 къошакъ майдан да хазырлагъанбыз. Кеси ызларында биринчиле болгъанла республиканы андан ары кезиуледе кёргюзтюрюкдюле. Финаллагъа жетерча болсала уа, бютюнда бек къууанырыкъбыз, - дегенди министр. Ушакъны кезиуюнде журналистле быйыл жангы компетенцияла къошулгъанларын бла къалгъанларын билирге сюйгендиле. Чемпионатны координаторлары билдиргеннге кёре, быйыл «Сатыу-алыу» компетенция кийирилгенди. Аны сылтауу бу усталыкъгъа сурам болгъаны бла байламлыды. Школчуланы къауумунда да аллай ыз аш-суу хазырлау бла байламлыды. Былтыр алагъа деп «Адаптивая физкультура» деген компетенция кийирилген эди. Чемпионат тамбла ачылып, юч кюнню ичинде бадырыллыкъды.
Поделиться:
Читать также:
12.03.2024 - 10:42 →
Предпринимательликни тасхалары бла шагъырейлендиргенди
07.03.2024 - 08:30 →
КъМКъУ – тамблагъы кюнню университети
06.03.2024 - 13:59 →
Окъуугъа кирип, умутум толса
05.03.2024 - 16:46 →
Интернет къоркъуусуз болур ючюн
26.02.2024 - 13:21 →
Заманны излеми, огъесе …
|