Ышандыргъан ал атламла

Черек районда Къашхатауда КъМР–ни 100–жыллыгъына атап Культура юйню мекямында Сабий чыгъармачылыкъны юйю эки фахмулу суратчы къызчыкъны – Ахкёбекланы Бэланы эм Мокъаланы Амираны кёрмючюн къурагъанды. Анга район администрацияны къуллукъчулары, эллиле, журналистле да келген эдиле.

Кёрмючню ача туруп, Сабий чыгъармачылыкъ юйню директору Жуболаны Марианна къонакълагъа жюрек ыразылыгъын билдиргенди эм фахмулу сабийлеге бусагъатда айныу жолла ачылгъанларын чертгенди. Ызы бла Черек районну башчысыны орунбасары Башийланы Рамазан эм Черек районну Жамауат политикасыны таматасыны орунбасары Батчаланы Анатолий Бэланы  бла Амираны кёрмючню ачылыуу бла алгъышлагъандыла, бийик жетишимлеге жетерлерине ийнаннганларын билдиргендиле.

Байрамда суратчы къызчыкъланы тенглери, мольбертлерини алларына олтуруп, къараучула кёре тургъанлай суратла этгендиле. Сурат ишлеген сабий, анга жанындан къарасанг, бек сейирди, сени кёз аллынгда жангы дуния къуралгъанча! Сёзсюз, чыгъармачылыкъ адамны терен сезимлерин уятады, ол, сурат ишлей туруп, кесини жаны бла танышады, аны дуниягъа да баям этеди. Чыгъармачылыкъ бла кюрешгенни уяннган эси ариулукъну не бош затда да эслейди эм аны бизге кёргюзтеди.

Ахкёбекланы Бэла битеу суратларындан да энчи самоварын кёргенин чертгенди. «Бизни юйюрюбюзде бу самовар тёлюден-тёлюге бериледи, мен столда аны кёрсем, жюрегим тынчлыкъдан, энчи къууатдан толады», – дегенди ол. Аны анасы Ахкёбекланы Яна Жуболаны Марианнагъа, Локияланы Аннагъа сабийлени айнытыу къыйын, алай огъурлу ишлери ючюн ыспас этгенди.

Амира уа бир сыфатны къурай туруп, ол кеси аллына жашап башлагъанын айтханды: «Мен бууну суратлагъанымда, аны мюйюзлери терекле болгъандыла», – дегенди. Кертиси бла да, ушайдыла ала бир бирге. Табийгъатда хар зат да бир биринде, кюзгюдеча, кёрюнеди, араларында байламлыкъ эсленеди.

«Ашхана» проектни автору Мокъаланы Гюльнара да Бэлагъа бла Амирагъа аны курсларына сау жылны хакъсыз жюрюрча сертификатла саугъалагъанды.

Суратчы къызчыкъланы школда класс башчылары Мокъаланы Зухура кёрмючдеги ишлеге бийик багъа бергенди. Кертиси бла да, аланы кёбюсюнден кёзюнгю айырмаз эдинг, аллай бир кюч бар эди хар биринде! Сёзсюз, къызла хунерлидиле, бусагъатда интернет да айныргъа кёп онгла береди.

Не букъдурур кереклиси барды, арт жыллада барыбыз да эслейбиз: Культураны эм искусстволаны колледжинде, Искусстволаны институтунда да таулу студентле алай кёп тюйюлдюле. Сагъыш этейик, Гуданаланы Борисни, Будайланы Сулейманны, Уяналаны Асланны, Акъкъызланы Якубну, Курданланы Валераны, Занкишиланы Ибрагимни, Болатланы Людмиланы, Тёппеланы Хызырны, Ахматланы Леуанны эм башха суратчыларыбызны ызларындан ким келликди? Хазырмыдыла шёндюгю ата–анала, сабийлерини фахмуларын эслеселе, аланы бу жаны бла окъутургъа? Жиберликмидиле узакъ шахарлагъа окъургъа?.. Ким сюер сабийи суратчы болурун? Бу соруула къыйындыла, аны бла бирге уа бек магъаналыдыла.

Шёндюгю дунияда бир жамауат кесин халкъгъа санай эсе, аны театры, газети, музыкантлары, суратчылары, спортчулары да болургъа керекдиле. Битеу барыбыз да жаланда экономистле, юристле эм врачла болсакъ, сурат а ким ишлер, журналист а ким болур? Таулу элледе бийик художестволу билими болгъан кёрмючлеге къатышхан профессионал суратчыла бармыдыла, сабийлеге дерсле берген?! Тамблагъы кюнюбюзню юсюнден уллу сёлешмей,  быллай затлагъа эс бурургъа тийишлибиз. Бу къызчыкъла уа ол жаны бла жарсыуубузгъа себеп болурла деп бек ышанабыз.

Байсыланы Марзият.
Поделиться: