Фатарны алырдан алгъа сатыучуну бу ишге эркинлиги болгъанына къараргъа

 Къабарты-Малкъарны Кадастр палатасыны экспертлери фатарны неда юйню алырдан алгъа сатыучуну быллай операцияла этерге эркинлиги (дееспособность) болгъанын бла къалгъанын тохташдырыргъа юйретедиле. 

Жашар жерни алыу хар инсаннга да магъаналы ишди, былайда андан эслилик, законодательствону билиу изленедиле. Фатарны сайлагъандан сора сатыу-алыу келишимни тауусургъа тийишлиди. Ол кезиуде битеу ишеклик туудургъан шартлагъа уллу эс бурургъа керекди. Аллай чурумладан бири уа сатыучуну бу ишге эркинлиги болгъаны бла къалгъаныды. Бу ишни тамамларгъа жарамагъан къауумгъа акъылбалыкъ болмагъанла бла психикалары ауругъанла киредиле. 14 жыллары толмагъанла «недееспособныйлеге» саналадыла, 14-18-жыллыкълагъа эркинликлени талайы бериледи, 18 жылларында уа – адамла алагъа закон бла тийишли эркинликлени барысын да хайырланаладыла.

Психикалары ауругъанланы юслеринден айтханда, аланы эркинликлерине сюдню оноуу бла чек салынады эм алагъа опекунла къараргъа борчлу боладыла. Саусузну атындан сатыу-алыу ишлени аны опекуну бардырады. Аны бла бирге «недееспособный» инсанны мюлкге ие болургъа эркинлиги сыйырылмагъанын да билирге керекди, дейди эксперт Аслан Тохов. 

Адамны псикасында ауруу болгъанын тохташыргъандан сора сюд оноууну юсюнден опека эм попечительство органлагъа билдиреди, ала уа юч кюнню ичинде бу информацияны эсеплеу-регистрация органлагъа ётдюредиле. Алада Тепдирилмеген  мюлкню бир къырал реестрине (ЕГРН) сюдню оноууну юсюнден жазыу этиледи. Аны ючюн фатарны алгъынчыгъа дери сатыучудан ЕГРН-дан выписканы излерге керекди.

Сатыучуну ауругъаны ачыкъланса, эсигизде болсун – законнга тийишлиликде аны иелигинде болгъан мюлкню алыргъа (отчуждение) жарамайды. Алай 48-чи номерли Федерал законнга кёре талай энчиликле да бардыла. Сёз ючюн, андан фатарны алыргъа боллукъду рента неда алышыу келишимге кёре (андан саусузгъа файда тюше эсе) неда ауругъан жашаргъа башха жерге кёчюп кете эсе. Юй сатылады ауругъаннга багъалы багъыу керек бола эсе да. Алай эсигизде болсун – психикасы ауругъандан фатарны алыу бла байламлы битеу ишлеге нотариусну шагъатлыгъы изленирикди.

 

 

 

Кульчаланы Зульфия хазырлагъанды.
Поделиться: