«Юлгюлю» деген атына толусунлай келишеди

«Юлгюлю сабий сад 2021-2022» битеуроссей эришиуню эсеплерине кёре, Тырныауузну 3-чю номерли школуну 10-чу номерли «Жаворонушки» сабий сады хорлагъанланы-лауреатланы санына киргенди.

Учреждение 1985 жылны ахырында ишлеп башлагъанды. Жылдан-жылгъа аны мюлк онглары игилене баргъандыла. 2016 жылда анда сабийлени патриот ниетде ёсдюрюуге да аслам эс буруп башлагъандыла. Гитчелени Ата журтха кертичи болургъа, аны бла бирге уа туугъан жерлерини миллет адет-тёрелерине хурмет этерге юйретир муратда «Инсанны энчилигин миллет адеп-къылыкъ эм маданият хазналаны мурдорунда къурау» деген социал-маданият проект жарашдырылгъанды.

Бир жылдан а «Жаворонушки» «Тюрсюнлю парк» программа-методика комплексни сынау майданы болгъанды. Андан сора беш жылны ичинде ол бу программада ишлеуден уллу сынам жыйгъанды, аны юсюнден республикалы телевиденияда бериу да болгъанды. Аны хайыры бла сабийле суратла ишлеу, сахна эм чыгъармачылыкъ оюнлагъа кёбюрек къатышып башлагъандыла.

Бюгюнлюкде учрежденияда 8 къауум, процедура кабинети бла медицина блок, ашхана, музыка, хореография эм физкультура залла, кёрмючле къурар жери бла суратла ишлеу студия, гитче краеведение музей, бассейн бардыла. Алай бла мекямны босагъасындан атлагъанлай, сабийликни сейир, зауукълу дуниясына тюшесе.

Садик ишлеген 36 жылны ичинде ары 2 мингнге жууукъ сабийни жюрюгендиле. Бусагъатда да анда, алгъын заманладача, гитчелени жюреклери бла сюйген огъурлу юйретиучюле урунадыла. Кюн сайын ала 7 жыллары толмагъан 205 сабийге къарайдыла. Ала хар не жаны бла айныр, школда окъуугъа тынгылы хазырланыр ючюн устаз-логопед, малкъар тилден, суратла ишлеуден, музыкадан, физкультурадан устазла, жюзюуден инструктор бардыла.

Школгъа дери билим бериу учреждениягъа 19 жылны Макытланы Халимат башчылыкъ этеди. Мында къуралгъан ахшы тёрелени сакълар эм кёбейтир, аны ырысхы-техника онгларын игилендирир, юйретиу-окъутуу ишни къыйматын кётюрюр ючюн Халимат усталыгъын, заманын, къарыуун да аямайды. Ол а ахшы эсеплеге келтиреди. Шёндюгюлю излемлеге келишген жарыкъ, кенг отоула, ариу тюрсюнле, бир бирге тап келишген оюн, жукълагъан, ашагъан жерле – ала барысы да тынчлыкълы болумну къурайдыла, сабийлеге хычыуун кёрюнедиле. Анда ишлегенле кеслери уа учрежденияларына «жашнагъан тала», сабийлеге уа «гюлле» дейдиле.

Педагогланы юслеринден айтханда, аланы уллу сынамлары болгъанын белгилерге тийишлиди: 32 процентини бийик квалификация категориялары барды, 42 процентине да биринчи категория берилипди. Тюрлю-тюрлю эришиулеге къатыша, ала жетишимли да боладыла. Сёз ючюн, малкъар тилден устаз Балаланы Эльмира «Ана эм орус тиллени устазларыны битеуроссей мастер-класслары» конкурсну «Устаз – ана тилден бусагъатдагъы методика ишлени автору» деген номинациясында хорлагъанды. Элеккуланы Наталья бла Ботталаны Ирина «Россейде жылны юйретиучюсю» деген битеукъырал конкурсну регион кезиуюнде экинчи жерлени алгъандыла, Гызыланы Фатимат аны район кесегинде хорлагъанды.

Сабийле да ахшы кёрюмдюлери бла къууандырадыла, аланы араларында «Адам эм табийгъат» халкъла аралы оюн эришиуде, «Нарт Дебетни туудукълары» регион фестивальда, «Билим, чыгъармачылыкъ, сабийле», «Таурухлу аппала бла ыннала» республикалы эришиуледе, Мёчюланы Кязимни назмуларын окъуу конкурсда, Уллу Хорламны байрамына аталгъан интернет-конкурсда хорлагъанла эм алчы жерлени алгъанла бардыла.

- Юйретиу эм окъутуу иш Школгъа дери билим бериуню федерал стандартына тийишлиликде бардырылады, - дейди тамата юйретиучю Жолаланы Танзиля. – Биз социал-коммуникатив, физкультура, суратлау-эстетика, жарыкъландырыу, ариу эм тюз сёлешиу жаны бла билим беребиз, бу ишге ата-аналаны да къатышдырыргъа кюрешебиз. Сабийле оюн неда эришиу халда жолда жюрюуню эм от тюшюуден сакъланыуну жорукъларына юйренедиле.
 
Спорт залыбыз бла бассейн да адамсыз болмаучудула. Андан тышында гитчеле Элбрус районну спорт школларында секциялагъа жюрюйдюле, район эм республикалы эришиуледе хорлайдыла. Сабийлени сюебиз, алагъа огъурлу кёзден къарайбыз, сакъ болабыз, не излегенлерин ангыларгъа кюрешебиз. Сора, тёгерекдеги дуния алагъа сейир кёрюнюрча, ала аны таныргъа излерча этерге, башха адамла бла бир тил терк табаргъа юйретирге, аланы кеслерини энчиликлерин сакъларгъа итинебиз. Сабийле бизни тамблагъы кюнюбюздюле, алай эсе уа, ол къаллай боллугъу бизни къолубуздады.

Анатолий ТЕМИРОВ.
Поделиться: