Ачыкъ ушакъ, ышандырыу шартла

Кёп болмай  «Ангылатабыз. Къабарты-Малкъар» проектни чеклеринде КъМР-ни саулукъ сакълау министри Рустам Калибатов республиканы Правительствосуну «ВКонтакте» майданында тюзюнлей эфирге къатышханды. Тюбешиуню Регионнга оноу этиу ара къурагъанды.

Рустам Михайлович «Саулукъ сакълау», «Демография» миллет проектле республикада къалай бардырылгъанларыны юсюнден хапарлагъанды. Ол санда саулукъ сакълау учрежденияланы къайсылары ишленнгенлерин, къайсыларына, тынгылы ремонт  этилгенин билдиргенди, оборудование бла жалчытыу эм эпидемияология болум не халда болгъаныны  юсюнден  айтханды.

Министр адамланы  жарсытхан кёп соруугъа да  жууаплагъанды, ол санда   санкцияланы кезиуюнде медицина учрежденияла дарманла бла къалай жалчытылыннганларын туура этгенди. Ол былтыр ведомство бла белгиленнген проектлени бары да тамамланнганларын эсге салгъанды. Анга кёре, Нальчикде  Богдан Хмельницкий атлы орамда 1-чи номерли сабий поликлиникагъа, Майскийде сабий клиника больницаны бёлюмюне, Атажукино бла Малкада амбулаториялагъа тынгылы ремонт этилгенин сагъыннганды. Саулай алып айтханда, аланы саны онекиге жетеди. Аны бла бирге  Аушигерде жангы мардалагъа келишген амбулатория ишленнгенди, Нальчикде 1-чи номерли сабий поклиниканы  жанында жангы корпусну къурулушу барады   дегенди.

Рустам Калибатов бюгюнлюкде субъект миллет проектлени бардырыуда   беш  алчы регионну санына киргенин  уллу жетишимге санагъанды. Ол кёрюмдюге жетиуге республиканы Башчысы Казбек Коков уллу къыйын салгъанын да  чертгенди.   

Быйыл стационарлагъа  рентген аппаратла, эндоскопия эм ультразвук оборудование  да къошакъ халда  берилгендиле.  Ала алгъаракълада, багъала кётюрюлгюнчю,  алынып къалгъан эдиле.Ол себепден жунчумай  планнга тюрлениуле кийирмей, салыннган борчну толтурургъа къолдан  келгенди,- дегенди министр.     

Дарманла бла жалчыутыуну юсюнден айта, ведомствону таматасы препаратла бла къытлыкъ сынамаз ючюн федерал эм регион даражада  уллу иш этилгенин,  ОМС бла медицина организацияла дарманла бла  бир жылгъа   жалчытылыннганларына ышандыргъанды.

Миинстр бусагъатда  регионда   эпидемиология  болум къоркъурча болмагъанын да   эсге салгъанды. Сёз ючюн, быйыл февраль айда коронавирусдан ауругъанланы саны он минг эди. Бюгюнлюкде уа  энчи  госпитальда 65 саусуз жатады, керек болса, дагъыда жерле  бардыла.Юйлеринде амбулатор халда багъылгъанланы саны да  360-ха  жетеди.